As ciencias e a informática, protagonistas dos premios á excelencia lingüística da USC
mércores, 21 de decembro do 2011
Boas novas para o galego e, máis polo miúdo,
para o seu uso normalizado nos eidos máis técnicos. De feito, a ciencia e a
tecnoloxía foron precisamente as que se impuxeron nos premios á excelencia lingüística da Universidade
de Santiago de Compostela, na súa edición 2010-2011, dirixidos como o seu
propio nome indica a recoñecer o bo uso da nosa lingua, amais da súa promoción,
dentro dos traballos académicos da comunidade. Máis propiamente, os gañadores
foron unha estudante de Bioloxía, Efigenia Penabad Penabad, e un alumno de Informática
da Escola Técnica Superior de Enxeñaría, César Osorio Peláez.
O alumno de Informática recibirá unha contía
total de 300 euros a través da modalidade de achegas de fin de grao,
concretamente polo traballo Desenvolvemento
dun sistema para a visualización web do tesouro do léxico patrimonial
galego-portugués.
A estudante de Bioloxía, pola súa parte, resultou
premiada con 150 euros na categoría de traballos académicos por Efecto da privación da luz no
desenvolvemento da retina.
O xurado desta sétima edición, que tomou a
decisión este mesmo martes, estivo formado polo director do Servizo de
Normalización Lingüística, Manuel Núñez Singala; a secretaria xeral da USC,
Lourdes Noya; e María Cuquejo Enríquez, representante da Secretaría Xeral de
Política Lingüística da Xunta de Galicia.
“Os dous
estudantes galardoados”, informa a
USC, “xa gañaran no seu respectivo
centro o premio á calidade lingüística que convocan dende hai sete anos as
comisións de normalización de quince escolas e facultades de Santiago e Lugo”.
Entre os valores que máis se teñen en conta na concorrencia polos premios
figuran os seguintes: unha presentación axeitada do traballo ou documento
(formal e de contido) e un bo uso da
nosa lingua (corrección lingüística e terminolóxica).