As buscas de inmóbeis con dispositivos soben un 45% en dous anos
xoves, 7 de maio do 2015
O número de persoas que
procuran vivenda a través dos dispositivos móbiles non para de
medrar, dato que debera facer que as inmobiliarias e os propietarios
que seguen a teimar nas canles tradicionais para achegar as súas
informacións repensasen a súa estratexia. Segundo fan saber os
responsábeis do servizo Pisos.com,
un dos máis visitados a nivel español para visualizar bens inmóbeis
en lugares específicos, as procuras de vivendas a través de
dispositivos subiron un 45% en dous anos, pasando do 38% en 2012 ao
55% en 2014.
O estudo feito polo
portal tamén certifica, a nivel xenérico, que as aplicacións están
a desprazar ao computador para as operacións de busca de pisos e
casas, en compra ou aluguer, “basicamente porque dan o mesmo
servizo pero coa vantaxe de que o soporte é máis lixeiro, pódese
levar enriba e consultar en calquera recanto”. Para a empresa
responsábel da investigación, “a próxima revolución para o
mercado da vivenda será a tecnoloxía wearable, que está a
medrar amodo pero de xeito moi estábel”.
O informe tamén achega
datos de comportamento. Así, os usuarios que detectan un inmóbel
que lles parece interesante dende o seu trebello, adoitan responder
con hábitos máis ou menos fixos, en moitas ocasións simultáneos:
o 48% das persoas consultadas por pisos.com, manda un correo para
obter máis información da vivenda requirida; o 41% chama
directamente ao anunciante e o 40% marca o anuncio como favorito para
gardalo na súa área persoal. Asemade, un 27% adoita consultar o
anuncio a posteriori no seu computador, mentres que, se o
anuncio pertence a unha inmobiliaria, o 6% visita directamente a
axencia.
Á hora de valorar os
factores máis relevantes da procura de vivenda a través de
dispositivos móbiles, sendo 0 “nada importante” e 10 “moi
importante”, obter unha información clara e completa dos inmóbeis
sitúase na primeira posición da clasificación (7,57). En segundo
lugar, o máis esencial é que sexa posíbel recibir notificacións
inmediatas das vivendas dunha determinada zona, así como cambios no
prezo (7,21).