As aplicacións e a biotecnoloxía, eixes dos equipos gañadores dos INCUVI-Emprende (Campus de Vigo)
xoves, 26 de marzo do 2015
A cuarta edición dos
Premios INCUVI-Emprende resolveuse os días pasados e esta semana
colleu pulo coa incorporación das iniciativas gañadoras aos tres
campus da UVigo: o
Campus de Pontevedra (cos seus catro proxectos xa en marcha), o
de Ourense (con outras catro iniciativas recibindo enerxías na
Preincubadora da Tecnópole) e o
de Vigo, con seis novas empresas buscando o seu camiño no INCUVI
da Cidade Universitaria. Respecto a estas últimas, as start-ups
que collerán impulso en Vigo, dicir que ocuparon oficialmente os
seus postos na incubadora de Vigo e que pertencen a eidos como a
biomedicina, a asesoría forestal, o desenvolvemento de aplicacións
e mesmo o achegamento das tecnoloxías á infancia de xeito lúdico.
Segundo explica a
Universidade, alén dun espazo no que medrar, as novas iniciativas
recibirán formación, asesoramento e a posibilidade de compartir
experiencia con outros emprendedores e emprendedoras, “para que así
podan converter os seus proxectos en realidades”. As gañadoras e
gañadores desta edición dos premios, amais de gozaren dunha
subvención sobre os custos da estadía nos espazos INCUVI de Cidade
Universitaria, recibirán un teléfono fixo e outro móbil, un
dispositivo de web, un bono formación de 1.000 euros para cada
compoñente dos proxectos e asistencia gratuíta a cursos organizados
por diferentes entidades empresariais.
Unha destas seis propostas
é Diente de Tiburón, achega por Stefan Stefanov, Nina Yarovenko,
Rafael Pardo e Alejandro Ámez. Trátase dunha iniciativa que ten o
seu alicerce nunha patente orixinada na Universidade de Vigo e
baseada no dente de quenlla para o seu uso como produto biomédico en
tratamentos odontolóxicos e maxilofaciais.
Tamén ocupa o seu sitio
en INCUVI a nova empresa Apps que non cambian, de Xavier Mouriño,
unha iniciativa que salienta a “posibilidade de obter contactos
para poder dar a coñecer no ámbito público os nosos produtos”,
aplicacións web para facilitar a vida das persoas, que por exemplo,
queren facer o Camiño de Santiago ou saber como coordinar diferentes
alternativas de transporte público.
Impulsar o que se coñece
como sociedades de fomento forestal ou promover que os propietarios
se unan para xestionar as parcelas da maneira o máis eficiente
posíbel é o punto de partida de outra das propostas, Soforest, unha
iniciativa de Pilar Larrán, á que acompañará a súa irmá
estudante de Ciencias Económicas e Empresariais. Segundo apuntan, un
dos principais retos que afrontan é convencer aos propietarios e
propietarias duns terreos, “aos que é posíbel darlles outros
usos”, comentan.
Pola súa banda Jonathan Rodríguez, promotor
de Chatty Hive, informou que coa súa aplicación desenvolvida xa nun
80% pretende con esta iniciativa “cubrir un oco agora existente no
caso de redes sociais para fomentar a comunicación sobre temas de
interese, poñendo o acento precisamente nos temas sobre os que se
conversa e non nos perfís das persoas que participan”.
Por
último, Vigocorre e RobotyLab, promovidos por Sergio García e
Alberto Álvarez, respectivamente, apóianse directamente no
desenvolvemento de aplicacións de software e no achegamento das
tecnoloxías a nenas e nenos: ese será o seu cometido principal. No
no primeiro caso trátase dunha app específica para
corredores “e coa que ofrecemos servizos como rexistros de
percorridos ou plans de exercicio físico”, explica García, e o
segundo consiste nun proxecto que se pon en marcha coa idea de facer
chegar as novas tecnoloxías ao mundo infantil da forma máis lúdica,
“a través de obradoiros e actividades e tamén a través dunha
comunidade virtual”, sinala Álvarez.