As TIC copan boa parte dos proxectos gañadores de INCUVI-Emprende
venres, 17 de marzo do 2017
A
sexta
edición dos premios INCUVI-Emprende, convocados pola Universidade de
Vigo para impulsar nos seus campus a innovación e o emprendemento
tecnolóxico, xa ten os seus gañadores. Os nomes das 12
iniciativas emprendedoras escollidas (que pasarán o vindeiro ano nas
instalacións de incubación dos tres campus) foron desvelados este
xoves. En total houbo 23 finalistas, pero o proceso de escolma deixou
a cifra final nunha ducia de proxectos: seis do Campus de Vigo, catro
de Ourense e dous de Pontevedra, ademais de dous accésits, un en
Vigo e outro en Pontevedra. As novas tecnoloxías e a contorna
dixital foron novamente o nexo común de practicamente todas as
propostas (aplicacións móbiles, plataformas de traballo en rede,
economía de cooperación en liña). Entre as boas novas desta
edición figuran o incremento importante da participación feminina,
xa que dos 38 proxectos que se presentaron en total, o 42,5% viñan
da man de mulleres. De feito, entre os gañadores tamén se mantén
unha situación case de equidade, con 12 homes e 11 mulleres.
Seis
novos emprendedores para Vigo
Nas
instalacións da pre-incubadora do Campus de Vigo, situada na Cidade
Universitaria, os seis proxectos gañadores disporán durante un ano
dun ecosistema de crecemento e maduración das súas ideas. Entre os
seleccionados hai propostas de moi diferentes eidos, dende as redes
sociais e a economía colaborativa a propostas máis tanxíbeis
relacionadas coa construción ou o sector alimentario.
Bursay-Language
& Digital Services é unha das ideas seleccionadas, unha axencia
dixital de expertos lingüísticos para tarefas de tradución,
corrección e redacción de textos en galego. Os seus promotores,
Yasmina Figueroa e Rubén Pérez, egresados de Filoloxía e
Tradución, explican que Bursay combina servizos lingüísticos e
dixitais e “como expertos neste eido somos conscientes da urxente
necesidade de mellorar o estatus do galego, tanto traballando con el
como ofrecendo servizos de mellora de calidade e prestixio”.
No
contexto tecnolóxico está DIBLEO - Networking Community, unha rede
social de emprendemento universitario que crea relacións de
networking entre profesionais que actúan como mentores e
mozos e mozas emprendedores.
Polo
que atinxe a WCube, trátase dun espazo virtual para exhibir arte
contemporánea impulsado por un estudante da EE Industrial e unha
egresada de Belas Artes, coa finalidade de crear “unha galería
virtual” para achegar á mocidade mediante unha contorna dixital a
arte contemporánea.
Sapere
Vedere é a proposta de José Martínez para a transformación de
produtos cárnicos con orixe no porco celta, mentres que Unidade
Tintométrica Móbil, idea de Andrés Valga, aposta polo uso dun
vehículo para trasladar os medios necesarios para a comparación de
tonalidades e elaboración da pintura á porta do taller. Completa o
grupo de gañadores vigueses o proxecto Tiny House, centrado na
fabricación e venda de casas construídas sobre remolques. Tamén se
entregou un accésit en Vigo a Slick. Cambiemos el Fitness.
Catro
novas ideas empresariais destino Ourense
Impulsada
por Melanie Sol, Nutrición Integral en Tu Empresa é unha das catro
ideas gañadoras. “O meu proxecto consiste nun programa de benestar
global para as empresas, a través do que se detectan necesidades
puntuais dos empregados da organización e se ofrecen solucións
estratéxicas para que melloren a súa calidade de vida”, explicou
Sol, ex-alumna do Máster en Nutrición.
Impulsada
por Eva Robledo, da Facultade de Ciencias Empresariais e Turismo,
outra das iniciativas gañadoras é Ridesport, unha plataforma en
liña de economía colaborativa que ten como finalidade o turismo
deportivo, poñendo en contacto viaxeiros con residentes para que
poidan practicar a modalidade deportiva que comparten.
Estas
dúas iniciativas terán como veciños na preincubadora ourensá a
Kuatro Marketing Digital, un proxecto de asesoramento e deseño de
solucións estratéxicas e operativas de mercadotecnia dixital que
optimicen a presenza en liña de calquera modelo de negocio, e OuVIr,
que se centra en xerar unha acción transformadora para as persoas
con diversidade funcional de todo tipo, dende cognitiva a intelectual
e persoas en situación de dependencia, ofrecendo asistencia persoal.
Dous
proxectos sobre novas tecnoloxías gañan en Pontevedra
E de
Ourense a Pontevedra, Needin e Mediación Móvil son os dous
proxectos gañadores con destino ás instalacións de AJE Pontevedra,
e xunto a eles houbo un accésit para Galewood. Needin busca crear
unha plataforma virtual para facilitar o contacto entre especialistas
autónomos do eido sociosanitario, por exemplo, profesionais da
enfermaría, psicoloxía, avogacía, traballadores sociais, etc. con
persoas que poidan precisar dos seus servizos. No caso de Mediación
Móvil, os dous promotores buscan crear unha aplicación para
dispositivos móbiles e unha web para ofrecer un servizo de mediación
para empresas, organizacións e particulares que precisen resolver
conflitos.
INCUVI
Avanza para Brigantia e .beLeader
O
xoves tamén se deron a coñecer as dúas iniciativas gañadoras dos
premios INCUVI-Avanza, unha convocatoria que trata de consolidar os
dous mellores proxectos gañadores da pasada edición de
INCUVI-Emprende, que seguirán desenvolvéndose no CITI de Ourense e
no Parque Empresarial de Porto do Molle. Nesta ocasión os
seleccionados foron Brigantia e .beLeader, outorgándose tamén un
accésit para MycoGalicia. Brigantia é un espazo onde crear e
desenvolver programas e actividades que promovan a igualdade e o
respecto polo medio ambiente, avivar un lecer e tempo libre saudábel
fóra do consumismo, e onde promover e fomentar a lingua e a cultura
galega. .beLeader é unha solución web orientada ao turismo de baixo
custe.