As JAI chegan á súa sexta edición xuntando industria e universidade a prol da automatización
xoves, 25 de setembro do 2014
Hai
oito anos botaba a andar a primeira edición das Xornadas
sobre Tecnoloxías e Solucións para a Automatización Industrial
(JAI)
e o vindeiro mes de novembro (do 3 ao 7 deste mes) terá lugar a súa
sexta edición. O encontro levarase a cabo en Vigo, e as JAI
volverán servir de punto de unión de industria e universidade
arredor dos novos avances en automatización. O eido da enxeñaría
atoparase reunido nesta cita bianual da man do Departamento de
Enxeñaría de Sistemas e Automática da Escola de Enxeñería
Industrial. O profesor Ignacio Armesto, coordinador das xornadas,
apunta que contarán con salientables empresas como: ABB, Beckhoff,
Bosch Rexroth, Harting, Kepware, Kuka, MatrikonOPC, Omron, Phoenix
Contact, Rockwell Automation, Schneider Electric, Siemens, WEG ou
Wonderware. De feito, explica que contan "con máis
multinacionais ca nunca, malia a crise”.
Ao
longo de cinco días, cada unha delas presentará os seus últimos
avances na área da automatización industrial e afondaranse en temas
de actualidade como "a eficiencia enerxética, a robótica
cooperativa, a impresión 3D, as aplicacións de seguridade en
máquinas ou as smart
factories”.
Armesto engade que Universidade, empresas e institucións “seguen
vendo nestas xornadas un piar formativo e informativo que axuda a
relacionar o tecido industrial galego coas grandes marcas nun espazo
común, así como un instrumento para coñecer as tendencias e
innovacións neste sector industrial”.
Asemade, dicir que tamén
estarán presentes tres centros tecnolóxicos galegos: Gradiant,
Aimen e CTAG que presentarán algúns dos seus proxectos. Gradiant,
levará ao Centro Social Afundación un sistema de localización en
interiores e Aimen un robot que axuda nos labores de recuperación
motriz de pacientes tras sufrir, por exemplo, un ictus. A Escola de
Enxeñaría Industrial achegará tamén unha impresora 3D mentres que
empresas como Kuka agardan poder presentar neste evento ao
robot iiWA. Ademais os asistentes tamén poderán coñecer de
primeira man tres robots.
Máis polo
miúdo, o luns 3 de novembro dará comezo o programa, tras o acto
oficial de inauguración, cun relatorio que impartirá un
representante de Ence sobre a Evolución
das tecnoloxías de control en plantas de celulosa.
Logo, terá lugar unha conferencia da man de PSA Peugeot Citröen,
que versará sobre as Car
Easy Apps, desenvolvemento de aplicacións no coche conectado”.
Esta xornada inaugural culminará facendo unha chiscadela ás Google
Glass, na que se explicará como poden axudar aos
procesos industriais da man de Itglas and Wear Technologies.
Ignacio
Armesto explica que entre os temas máis senlleiros desta edición
está a robótica colaborativa, que permite que robots e humanos
traballen xuntos na cela de fabricación, sen valados de protección,
xa que achegan sensores que impiden accidentes. Outros dos temas
serán as enerxías renovables e as tecnoloxías de mobilidade e a
súa aplicación á industria, como por exemplo o coche conectado.
Engadir, por último, que o prazo de matrícula está aberto até
a celebración das xornadas, que se retransmitirán en directo por
UVigoTV.