As Cíes acollen esta fin de semana a terceira xuntanza de Couchsurfing Vigo
venres, 21 de xuño do 2013
As Illas Cíes seguen a
dar que falar dende o punto de vista tecnolóxico. Por que motivo?
Pois porque son un destino turístico de primeira orde, e hoxe en día
os turistas xeran coñecemento e información a esgalla nas redes
sociais (viaxes con pegada) e, polo tanto, demandan maneiras
axeitadas de comunicárense. Das Cíes temos falado con motivo dos
recoñecementos en liña ás súas praias, dos proxectos
web para documentalas e amosalas ao mundo ou da recente proposta
para
habilitar Wi-Fi no arquipélago galego. Agora é o intre de falar
doutra actividade a desenvolver nas Cíes que tamén nos toca de
preto: a xuntanza que preparan Couchsurfing Vigo e máis os
responsábeis da guía turística para móbiles ePocketGuide. A III
Internacional Cíes Island Meeting celébrase entre este
venres 21 de xuño e o domingo 23.
Trátase do terceiro
encontro organizado pola primeira das entidades, un colectivo que
promove a práctica do couchsurfing, que é unha iniciativa
que consiste no intercambio de aloxamento con persoas non coñecidas
de antemán, que contactan a través das redes sociais. “A
maioría de membros desta rede de viaxeiros”, informa o
colectivo vigués, “teñen en común a súa mentalidade aberta,
a súa paixón por viaxar e a súa arela por coñecer xente nova”.
Desta volta, os participantes contarán cunha importante novidade: a
presenza e apoio dos responsábeis de ePocketGuide, a aplicación
para móbiles intelixentes, que ofrecerán de balde unha guía con
rutas para o evento. Segundo engade o colectivo vigués, os dous
encontros previos nas Cíes tiveron “unha espectacular acollida,
con máis de 150 persoas de máis de 50 países”. A aventura
dará comezo este venres 21, coincidindo coa noite máis curta do
ano. Ao longo destes tres días haberá diferentes actividades de
lecer, entre as que se inclúe un acto poético, O Son da lúa
chea, da man de Marcos de la Fuente Almagato; un recital
acústico, Solsticio de Verán, obra de David Regueiro e unha
clase maxistral de ioga, impartida, durante o lusco e fusco do
sábado, por Óscar Fontán.
En 2011, este evento
situouse entre os 10 máis concorridos do mundo, informan os
organizadores, que nos lembran que a rede de couchsurfing conta
xa con arredor de 6 millóns de persoas situadas en 100.000 cidades
diferentes do planeta.
Como dixemos, os
seareiros das viaxes contarán coa aplicación para móbiles
intelixentes, ePocketGuide,
que combina unha axencia de viaxes cunha guía turística no
teléfono. Con ela, infórmase, poderán coñecer mellor e respectar
a contorna turística das Cíes, levar a cabo rutas de sendeirismo e
coñecer outras paraxes da contorna como o Cabo Home ou a Praia de
Samil. A aplicación está dispoñíbel tanto para iPhone como para
Android. Nela non só hai guías da contorna de Cíes senón das
principais cidades do país. Todas elas pódense descargar
gratuitamente até o 1 de xullo a través da AppStore de Apple ou do
Google Play de Android.