As Catedrais, votada como unha das mellores praias do mundo polos usuarios da web TripAdvisor

O servizo web para viaxeiros TripAdvisor, especializado en axudar aos turistas a elixir os hoteis-restaurantes e os destinos paisaxísticos que máis pagan a pena, presentou esta semana os gañadores dos premios Travellers´ Choice Praias 2013, uns galardóns que, como o seu nome indica, diríxense a tirar partido das opinións dos usuarios de TripAdvisor para materializar os greatest hits dos seus areais preferidos. Dáse a feliz circunstancia de que, unha vez máis, hai importante presenza galega no resultado final. De feito, a de As Catedrais, en Ribadeo, foi quen de coarse entre as mellores de todo mundo. Os premios, como dixemos, baséanse nas opinións de millóns de internautas e este ano recoñeceron a un total de 276 areais situados en África, Asia, o Caribe, Centroamérica, Europa, Oriente Medio e EE.UU.
A praia galega de As Catedrais, en Ribadeo, foi premiada en 6º lugar a nivel mundial, 2ª no ranking europeo e o 1º posto a nivel español. Ademais, outra praia galega tamén foi galardoada como unha das mellores do Estado, a praia da Lanzada, no Grove, Pontevedra, que se sitúa en 7º lugar. As Comunidades costeiras españolas mellor valoradas en canto ás súas praias foron a nosa (en primeiro lugar), Illes Balears, Andalucía, Euskadi e as Illas Canarias. As Illes Balears tamén foron premiadas a nivel mundial e europeo co areal Ses Illetes, en Formentera, situándose en 12º na listaxe internacional, 4º lugar no ranking europeo e 2º lugar a nivel nacional. Outras dúas praias das Balears foron galardoadas a nivel estatal, a praia de Cala Bassa, en Eivissa, e a praia de Es Trenc en Mallorca, ocupando o posto 8º e 9º, respectivamente. Andalucía, tamén foi premiada a nivel europeo con dúas praias: a praia de Bolonia, en Tarifa, ocupa o posto 14º en Europa e o 4º en España, mentres que Zahara dos Atunes, tamén na costa gaditana, sitúase no posto 23º da listaxe de Europa e o 5º en España. Doutra banda, Euskadi foi galardoada coa Praia da Concha, en San Sebastián, que ocupa a 11º posición entre as mellores de Europa e o 3º lugar en España. Por último, atópanse as Canarias, distinguidas en 6º lugar coa praia Cofete, en Fuerteventura, e a praia de Las Canteras, en Gran Canaria, en 10º posición da listaxe nacional.