Arrestado un internauta que ameazou en Twitter con facer estoupar un aeroporto

Hai quen pasa toda unha vida ou boa parte dela practicando o terrorismo e non só non atopa freo á súa actividade, senón que mesmo hai quen lle chama xefe de estado ou algo semellante. No outro extremo hai quen pode chegar a ter en conta a idea de levar a cabo algún tipo de ataque social e non só hai quen lle pon freo senón que mesmo acaba na cadea. A este último grupo semella pertencer o home británico que, segundo The Next Web, foi arrestado polo delito de ter feito unha brincadeira en Twitter. A orixe de toda historia, cóntase na dita web e reflíctese en Bitelia, está nas nevaradas que afectaron hai uns días ao Reino Unido e que mantiveron pechado algún que outro aeroporto.
Pois ben, tendo en conta que con este peche as probabilidades de amolar a algún que outro usuario disparáronse, o internauta posteriormente arrestado decidiu comentar o caso no Twitter e, de paso (xa que a Rede tamén favorece a liberdade de expresión), ameazar con facer anaquiños o aeroporto se non se abría.
Sete días despois, o usuario da dita rede social foi posto a disposición da xustiza, logo de a policía do país non atopase nas súas declaracións as típicas mostras de carraxe que se fan cando uns plans saen mal, senón algo máis delictivo e sospeitoso. O caso é que a concorrencia do internauta perante as autoridades, malia térselle dado liberdade baixo fianza, desencadeou que fose despedido do seu traballo. Con todo, a investigación non está pechada e as dúbidas o que hai de realidade na ameaza aínda non foron cen por cen resoltas, aínda que todo apunta a un exceso (e ben grande) de celo.
O caso está arestora a suscitar debates na Rede sobre até onde chega a liberdade de expresión na Internet e até que punto atopan seguimento calquera das moitas cousas sen importancia (ou iso cremos nós) que deixamos rexistradas. Segundo se conta en Bitelia, as mensaxes de Twitter que seguen o ronsel da devandita semella que foron sometidas a un proceso xeral de borrado.