Areasantiago.es, nova web turística sobre Compostela e os concellos da súa contorna
martes, 14 de xaneiro do 2014
Santiago e a súa
contorna teñen dende xa unha páxina turística de seu:
Areasantiago.es. Trátase
dun portal no que se reúne a información turística dos 19
concellos das provincias da Coruña e Pontevedra que integran este
cinto xeográfico ligado de xeito especialmente estreito a
Compostela. A web resultante, trilingüe (galego, español e inglés),
resulta “moi visual”, en palabras dos seus responsábeis, e
achega tódolos seus recursos xeolocalizados. Contén vídeos,
sección de descargas de fotografías, unha axenda cultural
programada para publicar de maneira automática nas redes sociais, e
ademais dun espazo adicado á información turística clásica sobre
monumentos naturais, festas, áreas de autocaravanas, aldeas con
encanto, camiños de Santiago e itinerarios.
Ademais, posibilita
reservas en liña a través da central de reservas local e o grupo de
traballo avanza en contacto coa Consellería de Medio Ambiente co
obxectivo de incluír a opción de solicitude de permisos de pesca de
maneira axilizada.
A
presentación da web desenvolveuse este martes no consistorio
santiagués, nunha cita cos medios presidida polo alcalde da
capital galega, Ángel Currás, e coa asistencia dos rexedores de
Padrón, Rois, Silleda e Melide e os concelleiros de turismo de
Compostela, Lalín, Padrón, Vedra e Vila de Cruces.
A web está enmarcada
dentro do Plan de Acción 2013-2015 de Área Santiago. Un plan que
ten como obxectivo “mellorar a información turística e a
visibilidade dos 19 concellos (A Estrada, Ames, Arzúa, Boqueixón,
Brión, Lalín, Melide, O Pino, Oroso, Padrón, Rois, Santiago,
Silleda, Teo, Touro, Trazo, Val do Dubra, Vedra e Vila de Cruces),
poñendo en valor os seus recursos naturais”. A páxina darase a
coñecer a nivel estatal o vindeiro 22 de xaneiro na Feira
Internacional de Madrid, FITUR, xunto ao mapa turístico e a
aplicación móbil de Área Santiago.