Aprobados no pleno da Deputación os 8,6 millóns de euros do centro Coruña Estudio Inmersivo (CEI)
luns, 27 de novembro do 2023
A
Deputación
da Coruña aprobou en pleno, con 17 votos favorábeis (do PSOE, do
BNG e de Alternativa dos Veciños) os orzamentos da entidade
provincial para o ano 2024, que serán de 222.151.200 euros, a
contía máis alta da historia da institución e un 7,2 % superior ao
do actual exercicio.
O
presidente da Deputación, Valentín González Formoso, defendeu que
os orzamentos terán como principais prioridades “a creación de
emprego, o benestar social e o desenvolvemento do rural” e destacou
a gran importancia de programas coma o Plan único de obras e
servizos (POS+) ou o Plan de emprego local (PEL), que, segundo dixo,
“están sendo fundamentais para a creación de emprego,
infraestruturas e oportunidades, en particular nos pequenos
municipios da provincia”.
Nos
orzamentos 2024, o Plan de Emprego Local (PEL) tamén o seu orzamento
en 2024 ata os 16 millóns de euros (un 24,1% máis). Este medre
permitirá reforzar programas de contratación de persoal en empresas
e concellos e apoio ao emprendemento, pero ademais, o PEL apostará
en 2024 por potenciar sectores estratéxicos como a biotecnoloxía, a
economía circular ou o sector audiovisual, coa construción de
Coruña Estudio Inmersivo (CEI), o maior estudio audiovisual virtual de
España, que se localizará na Cidade das TIC.
Así,
Coruña Estudio Inmersivo (CEI) supón un investimento de 8,6 millóns
de euros, co-financiado con fondos do Plan de Recuperación do
Goberno de España no marco do proxecto España, Hub audiovisual
de Europa.
A
Deputación adxudicou o pasado agosto a Telefónica o desenvolvemento
da tecnoloxía por 6,1 millóns de euros e ten en licitación a
construción do edificio que albergará o CEI por 2,5 millóns de
euros.
Telefónica
encargarase da parte de enxeñaría, dos sistemas de pantallas LED,
iluminación, cámara e ópticas, tracking, escenografía
virtual e xestión de media, das salas VFX e realizar a posprodución
de audio, ademais da instalación, da formación, do mantemento e do
soporte técnico.
Segundo explicou a Deputación, o sistema de
pantallas LED incorporará unha pantalla semicircular cun mínimo de
28 metros de longo e 6 metros de alto e resolución mínima de 4K e a
súa correspondente pantalla de teito móbil de máis de 100 metros
cadrados, “coa que se crearán fondos envolventes e dinámicos,
dotados de perspectiva e profundidade”. Este sistema de pantallas,
engadiu a institución provincial que preside Valentín González,
“permitirá recrear con absoluto realismo e capacidade inmersiva
calquera escenario real ou virtual, emprazándose nun gran plató de
750 metros cadrados co que contará o novo edificio”.
O
escenario incorporará a maiores un sistema de iluminación xeral e
de reforzo, sistemas de cámaras e ópticas cos seus soportes e
accesorios, sistema de tracking, sistema de escenografía
virtual, xestión de media, infraestrutura de vídeo e rede de datos.
Tamén se inclúe o sistema eléctrico e a dotación tecnolóxica das
salas VFX e de posprodución, conseguindo que o equipamento funcione
de forma integrada.
A Deputación aclarou recentemente que “a
combinación dos sistemas de escenografía virtual VR/AR/XR e
pantallas LED posibilitarán aos produtores de cine e televisión a
creación de contornas virtuais altamente detalladas e realistas que
ofrezan unha experiencia inmersiva ao espectador e que posibiliten a
creación de contido interactivo e de Realidade Aumentada de forma
que os actores poidan interactuar cos elementos virtuais en tempo
real”. A entidade provincial tamén salienta que esta instalación
innovadora permitirá “asumir un amplo rango de producións
cinematográficas ou de series, así como producións broadcast
e publicitarias”. Tamén se poderán crear, xestionar e transmitir
eventos virtuais en diversos campos como entretemento, educación ou
capacitación corporativa, entre outros.
O presidente da
Deputación, Valentín González Formoso, destacou que "con este
estudio audiovisual virtual sitúase á provincia da Coruña na
vangarda internacional, mellorando a competitividade das empresas
galegas do sector, e poñendo a Galicia como localización
estratéxica de producións de cine, televisión ou
videoxogos".
Ademais do equipamento, a Deputación xa
completou a redacción do proxecto de construción do edificio que
albergará o CEI nun edificio de nova construción localizado na
Cidade das TIC da Coruña, cunha superficie en planta de 4.160 metros
cadrados, dos cales 750 metros resérvanse para albergar o plató
virtual.