Apple podería ter acordado a compra de Beats Electronics por 3.200 millóns de dólares
venres, 9 de maio do 2014
A compañía estadounidense Beats Electronics conseguiu moita
visibilidade nos últimos anos coa súa marca Beats by Dr. Dre, asociada
principalmente a auriculares dun prezo un tanto elevado (considerado como
elevado pola súa discutible calidade) pero que conseguiu converterse en todo un
referente cultural grazas ao apoio de numerosos artistas da industria musical,
o que levou hai preto de 3 anos a HTC a facerse co 50,1% da compañía por 309
millóns de dólares, de xeito que era o único fabricante de smartphones que
podía utilizar esta marca nos seus produtos. Pero esta aventura conxunta entre
HTC e Beats non durou moito, e o pasado ano HTC desprendeuse das súas
participacións na empresa, dando a entender que non fixo un bo investimento,
polo que agora sorprende a información publicada polo Financial Times na que dan
a entender que Apple está a negociar a compra de Beats Electronics por 3.200
millóns de dólares, no que sería a adquisición máis grande realizada na
historia da compañía de Cupertino.
O propio Dr. Dre, rapeiro detrás desta marca, apareceu en Facebook nun vídeo
publicado polo actor Tyrese Gibson, no que o artista figura aparentemente bébedo,
celebrando a venda da súa compañía, mentres o
actor que o acompaña di que Forbes vai ter que actualizar a súa listaxe coas
persoas máis ricas do mundo, ao que engaden que Dr. Dre converteríase no “primeiro
mil millonario do hip-hop, aquí, na puta Costa Oeste”. O vídeo en cuestión
retirouse ás poucas horas, polo que enténdese que estamos ante unha
confirmación informal da operación que queda pendente do anuncio oficial por parte
de Apple.
Segundo comentan distintos medios especializados, a operación de adquisición de
Beats non buscaría facerse cun fabricante de auriculares, senón que pretendería
a compra de Beats Music, servizo de streaming de música baixo subscrición que
lanzaron a primeiros de ano nos EE.UU. Haberá que agardar ao anuncio oficial da
operación para saber o que Apple fará realmente con Beats, pero polo momento
temos a impresión de que a compañía da mazá trabada busca potenciar a súa
presenza na industria musical, da que parecía afastarse pouco a pouco coa caída
de vendas do iPod e a emerxencia doutros dispositivos nos que a imaxe ten un
maior peso.
Vídeo no que Tyrese Gibson e Dr. Dre celebran a suposta compra de Beats por parte de Apple