Appentra compartirá as súas tecnoloxías cos desenvolvedores nunha cita en Santiago
venres, 21 de abril do 2017
Appentra, a empresa galega de alicerce
tecnolóxico, é unha das entidades co-organizadoras do que será un
dos eventos TIC máis interesantes da tempada: o GPU Hackathon que se
celebra en Santiago entre o 29 de maio e o 1 de xuño, da man da dita
firma coruñesa e do Centro de Supercomputación de Galicia (CESGA).
Como lembraremos, Appentra é
unha spin-off da Universidade da Coruña con sede no Centro de
Investigación TIC (CITIC). Entre os seus obxectivos figura o de
compartir coa nosa comunidade de desenvolvedores os seus achados
tecnolóxicos. Esta arela de apoiar aos profesionais, compartida polo
CESGA, é a base do evento-quedada
GPU Hackathon.
Será unha xuntanza de balde, aínda que con
aforamento limitado. O obxectivo concreto e literal, informaron
recentemente as entidades organizadoras, “é axudar aos
desenvolvedores a acelerar a execución das súas aplicacións de
simulación usando o hardware, o software e o equipo de mentores
proporcionados polo CESGA e Appentra”. Ao final do evento, os
participantes disporán dunha nova versión acelerada en GPU ou dun
roteiro (folla de ruta) para o devandito obxectivo.
As
sesións, en palabras do CESGA e Appentra, van dirixidas a calquera
que teña unha aplicación de simulación numérica escrita en C/C++
ou Fortran e que desexe acelerar a súa execución. A intención dos
organizadores é contar cun equipo de até dúas persoas para cada
aplicación. “O noso obxectivo”, explican a maiores, “é que os
desenvolvedores tiren o máximo proveito do hackathon
traballando no seu código o 95% do tempo, e compartindo experiencia
cos mentores expertos en optimización, paralelización e execución
de programas de simulación”.
A
remate das sesións, buscarase establecer unha relación de
colaboración cos equipos para “crear casos de éxito que poidan
ser publicados durante os meses seguintes ao hackathon”.
Estes exemplos prácticos obterán “ampla difusión nos medios e
nas canles especializadas”.
Appentra
e as súas ferramentas software avanzadas
Appentra
é unha empresa de base tecnolóxica spin-off da Universidade
de A Coruña fundada en 2012. A súa misión é “fornecer as
mellores ferramentas de software de calidade que permitan un amplo
uso de técnicas de computación de alto rendemento (HPC) en todas as
áreas de aplicación da enxeñaría, a ciencia e a industria”.
A
computación de alto rendemento (HPC polas súas siglas en inglés)
considérase como unha tecnoloxía clave para o futuro da industria,
a ciencia e a sociedade. Segundo ten informado a firma coruñesa, as
empresas están a empregar estes recursos de computación para
mellorar o servizo ao cliente mediante a análise de volumes de datos
cada vez máis grandes; a minería de datos para mellorar a
seguridade da rede da empresa ou a simulación de produtos para
optimizar a calidade. Un dos cometidos principais de Appentra é
definir un conxunto de produtos para facer fronte a estes retos HPC
de rendemento e produtividade. “Son unha nova xeración de
ferramentas de software para axudar a xestionar a complexidade da
computación de alto rendemento e liberar todo o seu potencial”,
engade Appentra.