Apoio do Consello de Goberno da UVigo aos procesos que farían posíbel o Grao en Enxeñaría Aeroespacial
luns, 30 de marzo do 2015
Semella que o camiño
para dar forma ao Grao en Enxeñaría Aeroespacial no Campus de
Ourense é xa unha realidade, ou está case a piques de selo. Así
nolo deron a entender dende a Universidade de Vigo tralo Consello de
Goberno celebrado o venres pasado, cuxos membros amosaron o seu
“amplo apoio” á devandita titulación de dúas maneiras
concretas: votando primeiro a favor da súa declaración de interese
(coa abstención dun representante do alumnado), e segundo apoiando o
procedemento de elaboración das memorias para a solicitude de
verificación da titulación.
A memoria completa,
fíxose saber, será elaborada por unha comisión de estudos nomeada
por unha xunta de titulación conformada polas direccións das
escolas de enxeñaría dos campus de Vigo e Ourense, así como da
Facultade de Ciencias, directores e directoras de departamentos do
ámbito tecnolóxico e responsábeis de seis dos departamentos do
ámbito científico implicados, así como unha ducia de
representantes do estudantado e cinco do persoal de administración e
servizos.
O respaldo á
iniciativa dos membros do Consello estivo precedida dunha exposición
da mesma por parte do reitor, na que Salustiano Mato rememorou os
antecedentes que conduciron á presentación desta proposta que
“singular no sistema universitario galego” e que representa,
segundo o reitor, “unha oportunidade estratéxica para a
Universidade de Vigo e para Galicia”. Tras lembrar as cifras de
crecemento de emprego que está rexistrar este sector “cunha forte
aposta pola investigación básica”, Mato explicou que a proposta
presentada á Xunta o pasado mes de decembro recibiu o visto e prace
do propio presidente do executivo autonómico, Alberto Núñez
Feijóo, intre no que a iniciativa comezou a ser estudada no Campus
de Ourense, cuxo consello aprobou o inicio dos trámites para a súa
implantación a mediados deste mes.
O director da Escola de
Enxeñería Industrial, Juan Pou, dixo no Consello de Goberno que “na
Escola consideramos que esta é unha oportunidade para toda a
Universidade, pero debe facerse ben desde o principio para evitar
erros”. Pou, que reclamou apoio económico, por que “este será
un grao moi caro, que precisa de especialistas cos que a institución
non conta neste intre”, incidiu en que o obxectivo principal “son
os alumnos, e non as cidades, os profesores ou os departamentos”.
Pola súa banda o director do Departamento de Física Aplicada, José
Luis Legido, tamén deixou constancia na sesión do apoio do seu
departamento á posta en marcha da titulación e á creación dun
centro propio, ao tempo que realizou unha oferta de colaboración
para participar neste proceso.