Anxo Lorenzo pon en valor o audiovisual galego no seu proceso de adaptación ao contorno dixital

A Facultade de Ciencias da Comunicación da Universidade de Santiago de Compostela acolleu esta mañá a inauguración da xornada A obra audiovisual. Propiedade intelectual e contexto dixital, evento que aproveitou o secretario xeral de Cultura, Anxo Lorenzo, para reflexionar sobre o papel das tecnoloxías para ampliar o abano de posibilidades dos produtores e creadores do ámbito audiovisual. O secretario xeral de Cultura estivo acompañado no acto pola presidenta de AGAPI, Dolores Ben, e polo secretario académico da Facultade de Ciencias da Comunicación da USC, Fernando Redondo.
Lorenzo precisou que “as tecnoloxías abren novas portas para acceder a públicos diversificados que, ao mesmo tempo, presentan novas formas de consumo ás que as empresas do sector deben saber atender e albiscar nos seus movementos”.
Ao fío disto, afirmou que “calquera sector cultural debe entender o contorno tecnolóxico como un reto e unha oportunidade para impulsar novos formatos, para favorecer novas formas de consumo e para chegar a novos públicos”.
O secretario xeral de Cultura asegurou que “a dimensión dixital da creatividade obriga a unha reflexión e a unha capacidade de responder aos novos contornos de traballo e de difusión”. Neste sentido felicitou a AGAPI, entidade que congrega unha boa boa representación das empresas audiovisuais, “por abordar este debate da propiedade intelectual no audiovisual, as posibilidades realistas de negocio e as ideas para construír unha cultura responsable e sostible do consumo a través de internet”. Finalmente, concluíu apuntando a necesidade de acadar un equilibrio entre contorno dixital e propiedade intelectual.