Anuncian na Wikimanía de México unha fundación para protexer aos wikipedistas da persecución

O colectivo mundial de wikipedistas vén de coller novos folgos cunha macroxuntanza celebrada en México (entre o 17 e o 19 de xullo) na que, entre outras cousas, fíxose pública a vindeira posta en marcha dunha entidade sen arela de lucro que protexa aos membros do devandito colectivo ante posíbeis persecucións. O evento Wikimanía celebrado no país azteca, a conferencia anual dos wikipedistas, foi quen de xuntar a máis de un milleiro de persoas con procedencia en arredor de 70 países.
Amais de anunciar medidas como a entidade anti-persecución debateron sobre o presente e o futuro da enciclopedia dixital Wikipedia (a de meirande envergadura de todos os acubillos de información feitos polo ser humano) e das pólas de coñecemento que lle foron saíndo á plataforma libre dun tempo a esta parte. Por exemplo a Wikimedia Commons (depósito de imaxes libres) ou o Wikcionario (dicionario escrito de forma colaborativa).
Respecto do futuro do toro central destas iniciativas, a Wikipedia, acordouse seguir esta folla de ruta: máis mobilidade (facer posíbel pa presenza da enciclopedia en liña en calquera dispositivo móbil, mellor experiencia de usuario (impulsando o acceso universal a todos contidos) e mellores ferramentas de colaboración.
Nun plano máis específico a cita contou coa presenza de Jimmy Wales, co-fundador da Wikipedia, que foi precisamente o encargado de presentar a fundación adicada á loita pola liberdade de expresión dos enciclopedistas dixitais e, en xeral, dos internautas independentes. Esta entidade levará o seu nome e enfocarase a defender aos editores de Wikipedia que sufran de persecución por parte dos gobernos dos seus países como consecuencia do seu traballo na enciclopedia aberta. No seu relatorio, desenvolvido co epígrafe O estado da Wiki: Liberdade de expresión e Wikipedia, Wales anunciou que o recoñecemento ao Wikipedista do ano quedaría desta volta no anonimato, ou sexa que non se dará a coñecer publicamente co fin de salvagardar a seguridade da destinataria ou destinatario.