Anulan a sentenza por piratería contra o dono dunha copistería compostelá
martes, 26 de xaneiro do 2010
- José Luis Garabal nunha imaxe publicada por La Voz de Galicia
O Tribunal
Constitucional vén de anular
unha sentenza da Audiencia Provincial contra José Luis Garabal Vázquez, propietario
da copistería compostelá O Copión, a
quen condenaran en segunda instancia a indemnizar a Promusicae con máis de
6.000 euros e ao pago dunha importante sanción por permitir o uso de
ordenadores no seu local para efectuar reproducións e descargas de arquivos de
son e imaxe, que tamén podían gravarse en soportes que vendía o acusado, pero
que o Constitucional considera que non foi procedente por ter sido absolto en
primeira instancia, e non celebrarse unha nova proba e un novo xuízo no
tribunal de apelación, o que non daría as garantías suficientes ao proceso.
Na sentencia anulada considerábase probado o prexuízo económico aos artistas e
produtores musicais denunciantes (intervíranse máis 35.000 cancións, así coma
listaxes que o acusado ofrecía aos seus clientes), e prohibían ao acusado a
continuar coa actividade «ilícita»,
pero para decidir tal, o presidente da sala sexta da Audiencia Provincial,
Ángel Pantín, limitouse a visionar a gravación audiovisual do primeiro xuízo «para revalorar as probas de carácter
persoal practicadas», o que o Tribunal Constitucional considerou nulo, e o
avogado de Garabal considera que agora non queda outra posibilidade que non
sexa a súa absolución.