Anulan a Directiva comunitaria sobre a conservación de datos de telecomunicacións
martes, 8 de abril do 2014
Tras os atentados do 11 de maio de 2004 en Madrid e do 7 de
xullo de 2005 en Londres, aprobouse unha Directiva comunitaria que obrigaba aos
operadores de telecomunicacións a conservar os datos dos usuarios durante 2
anos, pero esta
norma vén de ser declarada inválida polo Tribunal de Xustiza da Unión Europea,
por considerar que “inmiscúese de xeito especialmente grava nos dereitos fundamentais
ao respecto da vida privada e á protección de datos de carácter persoal” e
aínda que consideren razoable que as autoridades busquen empregar os datos das
telecomunicacións para loitar contra a delincuencia grave, consideran que “ao
adoptar a Directiva sobre a conservación de datos o lexislador da Unión Europea
superou os límites que esixe o respecto do principio de proporcionalidade”.
O Tribunal considera que a Directiva debe establecer algún tipo de
diferenciación, limitación ou excepción en función do obxectivo da loita contra
os delitos graves, e non pode abarcar de xeito xeral a todas as persoas, medios
de comunicación electrónica e datos relativos ao tráfico. Tamén sería preciso
que a Directiva recollese criterios para que o acceso aos datos estea limitado
a autoridades competentes para previr, detectar ou reprimir penalmente delitos
poidan xustificar tal inxerencia pola súa gravidade.
A sentenza do Tribunal de Xustiza da Unión Europea tamén considera que o
período de conservación de datos é pouco preciso, pois indica un prazo de entre
6 e 24 meses, sen distinguir entre as categorías de datos en función das
persoas afectadas ou da posible utilidade dos datos con respecto ao obxectivo
perseguido.
Tamén matizan que é preciso incorporar ao texto lexislativo garantías que
aseguren unha protección eficaz dos datos contra os riscos de abuso e botan en
falta que non exista a obriga de que os datos se conserven dentro do territorio
comunitario.