Androidayuda.com: nova páxina para non deixar nada sen cubrir do sistema operativo de Google
mércores, 14 de marzo do 2012
Para os que xa saiban en que consiste Android
(ese sistema operativo de Google para teléfonos intelixentes e tablets que ten a vantaxe de ser aberto,
baseado en Linux e polo tanto achégase de partida a un mellor prezo, aínda que
con matices) e para os que anden aínda pensando que se trata dun personaxe
de Star Wars, dicirlles que vén de
xurdir no panorama en liña unha web que pretende esvaecer tódalas dúbidas que
teñamos sobre a cuestión. Trátase de Androidayuda.com,
un portal con novas, aplicacións, xogos e titoriais e que vén
da man do GrupoADSLZone coa arela de non deixar por cubrir ningún dos
elementos visíbeis ou invisíbeis de Android.
“Na nova
páxina”, informan, “atoparedes todo o relacionado coa ferramenta de xestión do xigante de
Internet, información para móbiles, actualizacións, manuais de axuda, análises
de aplicacións e xogos, etc”. Dirixindo as actividades do portal atópase
Miguel Ángel Criado, xornalista TIC con longa experiencia en medios como El
Mundo ou o recentemente desaparecido Público. A web tamén conta coas achegas de
Enmanuel Jiménez, especialista en telefonía móbil, Víctor Rodríguez, experto en
Android, ou Miguel Ángel Muñoz, xornalista con máis de dúas décadas de
traxectoria na prensa do sector.
