Andrés Mazaira falou na sede de Coremain da importancia de sermos innovadores e simplificar os nosos servizos
luns, 15 de abril do 2013
Andrés Mazaira, profesor
universitario e responsábel de iniciativas empresariais TIC como
Bridge Mediatech, foi
convidado os días pasados para participar nun encontro cos
profesionais da firma santiaguesa Coremain,
aos que animou a ter en conta a importancia de involucrárense na
xeración de valor e ideas innovadoras que sexan quen de romper
paradigmas e modelos establecidos. A cita, que se desenvolveu con
feitura de relatorio-debate na sede da propia compañía, centrouse
polo tanto en desbotar a vella idea de asumirmos nunha empresa un
papel secundario en todo intre en que non temos participación formal
na directiva. A xuízo de Mazaira, tódolos integrantes dunha
iniciativa empresarial son igual de importantes para o
desenvolvemento da mesma, sendo o valor dunha empresa, precisamente,
o que lle achegan os seus empregados. “Así”, dixo, “cada
traballador debe facerse imprescindible creando un valor que alguén
non puidese achegar”.
Asemade, lembrou que non
debemos darlle tanta importancia á información e ao dato como ao
que podemos facer con eles: “Se somos quen de facer útiles para
a toma de decisións os datos que almacena un cliente”, entón
xa o temos gañado. Apoiándose neste exemplo, advertiu que as
cousas, ou se utilizan ou son un custo, e se ao cliente lle metemos
moitos custos acabaremos por perdelo. Ao fío disto, e concretando en
cousas tecnolóxicas, indicou que “debemos ter coidado coa
saturación, xa que moitas veces podemos caer no erro de ir dotándoo
de novas características até saturalo, cando o éxito pode estar en
quitar funcións e innovar facendo un produto disruptivo novo”.
Exemplo diso, comentou, son as tablets ou os computadores
específicos para un usuario concreto, aos que podemos chegar tras
analizar as necesidades do cliente e quitarlles funcións e
aplicacións para acadar un produto máis sinxelo.
Andrés Mazaira, que foi
presentado polo director xeral de Coremain, Luís Álvarez Sestelo, é
licenciado en Económicas e Empresariais por ICADE, doutor en
Administración de Empresas pola Universidade de Vigo, con formación
específica en Dirección de Empresas de Servizos por ESADE e
comparte os seus coñecementos con empresas ofrecendo asesoramento
para que incrementen a súa oferta de valor apostando polo crecemento
e a innovación.