Amplíase o prazo para participar na III edición do Máster en Software libre de Igalia

Os responsables da terceira edición do Máster de Software Libre que organizan a empresa Igalia e a Universidad Rey Juan Carlos para atender á demanda de profesionais especializados en aplicacións abertas dentro do sector TIC, veñen de ampliar o prazo de inscrición ata o vindeiro 18 de setembro, un prazo extraordinario que poderán aproveitar aquelas persoas que non se puideron inscribir no pasado mes de xullo.
Os interesados en participar, que precisan ter amplos coñecementos en informática, deberán formalizar a súa matrícula, a través da páxina web oficial, antes da devandita data, e poderán beneficiarse das axudas dispoñibles nesta edición se cumplen algúns dos seguintes requisitos: ser estudantes titulados nos últimos dous anos en Enxeñaría ou Enxeñaría Técnica en Informática ou Telecomunicacións, pertencer aos colexios profesionais de Enxeñaría Informática de Galicia, Enxeñaría Técnica Informática de Galicia ou Enxeñería de Telecomunicacións, ser membro dalgunha das asociacións de Software Libre galegas, AGNIX, GALPON, GHANDALF, GLUG, OUSLI, ou GPUL, ou incluso traballar nalgunha das empresas asociadas a AGASOL e ASOLIF.
Asemade, os dous mellores expedientes entre os recén titulados da devandita especialidade, poderán optar a un 30 por cento de desconto no prezo final do Máster, que non será acumulable ao desconto aplicado por ser titulado.
As clases, que darán comezo a partir do vindeiro mes de outubro na Coruña, terán lugar os venres pola tarde e os sábados pola mañá, e os asistentes terán a oportunidade de asistir a congresos internacionais e a traballar en grupo durante o desenvolvemento da docencia.
O curso, que ten un custo de 7.000 euros (sen contar os descontos e a opción de realizar prácticas remuneradas), terá un enfoque práctico-técnico e oriéntase principalmente aos recén titulados e profesionais TIC que desexen mellorar as súas capacidades para xestionar, analizar e colaborar en proxectos internacionais de Software Libre.