Amplíase ao 7 de abril o prazo para presentarmos propostas ás XII Xornadas Libres do GPUL
venres, 5 de abril do 2013
- A edición 2011 dos encontros noutra imaxe de Txenoo
Segue en proceso de
adhesión de novos participantes, relatorios e asistentes a nova
entrega (a número doce), dos encontros de cultura e tecnoloxía en
aberto do Grupo galego de Programadores e Usuarios de Linux (GPUL).
Falamos das XII Xornadas
Libres do GPUL, que se celebran entre o 22 de abril e o 26 do
mesmo mes na Facultade de Informática da Coruña e que, como
dixemos, están a día de hoxe en proceso de enriquecemento do seu
programa de actividades (conferencias, concursos e obradoiros con
contidos do máis variado, pero sempre xirando arredor da tecnoloxía
e o coñecemento sen atrancos). A este respecto, cómpre sinalar que
a data de remate para a recepción de propostas vénse de ampliar até
este 7 de abril, ás 20.00 horas.
Como dixemos os días
pasados, a nova edición destas xuntanzas será unha proba máis de
que o open source non é só un tipo de tecnoloxía, é
tamén un xeito de traballar e unha filosofía de vida aplicábel a
todo. Neste caso concreto, aplicábel ao formato tradicional dunhas
xornadas de divulgación e reflexión, que serán (as do GPUL) como
software libre cobrando vida. Indo ao miolo do asunto, dicir que
teremos a oportunidade de asistir a conferencias, obradoiros e
concursos “con contidos do máis heteroxéneo, pero sempre
xirando arredor do mundo da cultura libre”.
Ou sexa,
xirando arredor do software libre, hardware libre, estándares
abertos, licencias, propiedade intelectual e un amplo etcétera
de cousas. Sobre o fornecemento de iniciativas particulares a
tratar durante as xornadas, a organización sinala que deberán ser
enviadas a través da plataforma
creada para tal fin, sendo preciso rexistro
previo e cubrindo correctamente o respectivo formulario
web.