Ames e Tecalis exporán en Innpulso un proxecto de identificación de avatares nas cidades do Metaverso
xoves, 13 de outubro do 2022
Este
venres, 14 de outubro, o
Concello de Ames e maila empresa local do sector da tecnoloxía,
Tecalis, con sede no Polígono de Milladoiro, van participar en
Valencia na sexta edición de Innpulso Emprende. Trátase do
evento máis significativo da Rede Innpulso, cuxa finalidade
principal é “facilitar o encontro entre responsábeis municipais e
o tecido emprendedor, á vez que se premian as iniciativas máis
innovadoras dos distintos municipios”. Acudirán o alcalde de Ames,
Blas García, a concelleira de Promoción Económica, Ana Belén Paz,
o director xeral de Tecalis, Isidoro Martínez, e maila directora de
asuntos corporativos e gobernanza, Berta Caro.
O
encontro, promovido pola Rede Innpulso e o Ministerio de Ciencia e
Innovación, celebrarase no espazo Veles e Vents, na Mariña de
Valencia, e conta neste caso coa colaboración do Concello de
Valencia, o centro de innovación Las Naves e Valencia Activa.
Innpulso
Emprende reúne anualmente a alcaldes e alcaldesas das cidades
pertencentes á Rede Innpulso coas pemes, micropemes e startups
máis innovadoras que foron seleccionadas por cada unha das cidades.
O evento constará de tres bloques de presentacións nos que as
empresas, acompañadas polo alcalde ou a alcaldesa do seu municipio,
deberán defender o seu proxecto nun prazo de tempo reducido.
Entregaranse dous premios, un deles será para o proxecto máis
innovador no ámbito da innovación social, e o outro será para o
proxecto máis disruptivo no ámbito da innovación tecnolóxica.
Ademais, haberá unha mención especial para a empresa máis
influencer, ou sexa, aquela que xerase maior tráfico e
interacción en redes sociais.
Como
complemento ao evento, as empresas participantes en Innpulso Emprende
terán tamén a oportunidade de participar no VLC Startup Market,
escaparate para empresas innovadoras e tecnolóxicas que, promovido
por Valencia Activa, celebrarase ao longo de toda a fin de semana nas
rúas da cidade.
Avatar
Identity Technology
Como
dixemos, o Concello de Ames participará no evento xunto coa empresa
local Tecalis. O director xeral de Tecalis, Isidoro Martínez, e
mailo alcalde de Ames, Blas García, presentarán o proxecto Avatar
Identity Technology. Trátase dun proxecto que está desenvolvendo
dita empresa para identificar e verificar a identidade dos avatares
nas cidades do Metaverso. O obxectivo é certificar calquera perfil
dixital no universo virtual. Trátase dunha tecnoloxía pioneira no
ámbito do Metaverso, a primeira das súas características. Segundo
explican o Concello e Tecalis, a día de hoxe existen organismos a
nivel mundial que están replicando no Metaverso as súas cidades
para tentar mellorar os sistemas de transporte, resolver problemas de
tráfico, xerar novos modelos de xeración de enerxía, mellorar o
seu modelo urbanístico, etc. A Avatar Identity Technology permitirá
dispor de perímetros organizados de seguridade no Metaverso.
O
rexedor municipal, Blas García, destaca que “Ames, que forma parte
da rede Innpulso desde o ano 2018, quere amosar a potencialidade do
noso concello na materia das comunicacións e as tecnoloxías, no que
contamos con varias empresas punteiras neste importante sector”.