Ames celebra este sábado a gala de Premios Galetiktokers 2022

A Casa da Cultura do Milladoiro acolle este sábado 5 de novembro, ás 19:00 horas, a gala de entrega de premios do certame Galetiktokers, unha iniciativa da Concellaría de Mocidade e de Normalización Lingüística que se pon en marcha por terceiro ano consecutivo e que ten como obxectivo “fomentar a creatividade da rapazada e animar a empregar o galego a través das redes sociais e das novas canles de comunicación”. Nesta edición, o evento contará coa actuación da cantante Pauliña, e participarán tamén as integrantes do xurado: a comunicadora audiovisual Noelia Francisco Lens, e a tiktoker Sara Seco Rial.
Os premios do concurso Galetiktokers suman este ano un total de 1.800 euros, repartidos en dúas categorías. A primeira engloba aos mozos de entre 13 e 16 anos, mentres que a segunda é para maiores de 17. Haberá seis vídeos gañadores en total, tres por modalidade. Deses seis galardóns, catro son outorgados polo xurado que valorou a orixinalidade, a creatividade, a claridade e a calidade lingüística. Os outros dous premios decidiunos o público a través dunha votación na conta de Instagram da Oficina Municipal de Información Xuvenil (OMIX).
Desta volta, presentáronse 65 vídeos, “unha cifra que triplica a da anterior convocatoria”, explicou o Concello, engadindo que desas propostas, 39 foron realizadas por mozas e mozos de entre 13 e 16 anos, mentres que as 26 restantes foron presentadas por maiores de 17 anos. En total participaron arredor dunhas 200 persoas, que abordaron temáticas moi heteroxéneas: dende música ata historia, pasando pola sociolingüística, o humor, o deporte, os videoxogos ou a igualdade de xénero, entre outras.