Amazon lanza Zocalo, alternativa “segura e doada” para o almacenamento e o intercambio de información
venres, 11 de xullo do 2014
Amazon Web Services
(división de ferramentas en liña de Amazon) vén de pór en marcha
un servizo na nube dirixido á almacenaxe e ao intercambio de
información (documentos, follas de cálculo, presentacións, páxinas
web, fotografías, arquivos PDF ou de texto) en condicións “seguras
e de sólido control administrativo”, segundo apunta a
multinacional. O servizo en
cuestión chámase Zocalo, e presenta un “alto nivel de
retroalimentación” para mellorar a produtividade do usuario. Con
esta ferramenta, engaden os responsábeis do seu desenvolvemento,
achégase un recurso cen por cen xestionado de almacenamento seguro
empregábel dende o dispositivo que prefiramos.
A raizame deste
desenvolvemento hai que buscala nunha demanda concreta: a necesidade
de darmos coa solución máis axeitada, á par que sinxela e
económica, en materia de xestión na nube de documentos e
colaboración empresarial. O obxectivo de Amazon era achegar algo
diametralmente oposto ao servizo máis recorrido nestes casos, o do
correo electrónico, en palabras da empresa “unha elección
desafortunada en moitos niveis empresariais” (a compañía sinala
que é sinxelo enviar correos a través destas ferramentas, pero nin
seguro nin doado mantelos organizados).
Polo tanto, engade
Amazon, “Zocalo facilita que os usuarios compartan e reúnan
información a través dunha ferramenta segura e central, botando man
de calquera dispositivo, incluíndo portátil, iPad, Kindle Fire e
tablets Android”. Asemade, conclúe, Zocalo ofrece ás
administradores regras de intercambio flexíbeis, rexistros de
auditoría, control da localización onde se almacenan os datos e un
custe de uso (“unha pequena cota mensual”) que nos abre a porta a
“un servizo completamente xestionado para que os clientes poidan
ofertar aos seus usuarios capacidade de almacenamento e de
intercambio de arquivos seguros”.