Altia e a ETSE premian á nova investigadora Ainhoa Vivel
luns, 20 de febreiro do 2023
A
empresa tecnolóxica Altia
e a Escola Técnica Superior de Enxeñaría da USC celebraron a
cuarta edición do certame Altia Premia, unha iniciativa conxunta
que busca incentivar e fomentar o talento tecnolóxico dos estudantes
do Grao en Enxeñería Informática da Universidade de Santiago de
Compostela. O Traballo de Fin de Grao (TFG) premiado este ano aborda
o uso de técnicas de aprendizaxe automática con redes neurais na
estimación da idade dental.
Nesta
cuarta edición, o xurado concedeu o premio (dotado con 1.500 euros)
a Ainhoa Vivel Couso polo seu TFG titulado AgeX: Explicación
automática en linguaxe natural do cálculo da idade dental.
“Este
premio é a proba de que o traballo e o esforzo sempre obteñen
recompensa. O meu obxectivo con esta investigación é axudar a que o
profesional poida comprender mellor as decisións tomadas pola
Intelixencia Artificial, contribuíndo a eliminar a desconfianza nos
sistemas e a aversión para utilizalos, especialmente en ámbitos de
alto risco para as persoas como é a medicina. Por iso, agradezo
profundamente esta distinción por parte do xurado e de Altia”,
comentou a gañadora.
Josefina
Fernández, directora de Operacións en Altia e membro do xurado,
resaltou a importancia de recoñecer o talento novo: “Os estudantes
de hoxe son os profesionais do mañá. A ilusión e a motivación que
demostran é excepcional e temos o deber de incentivar as ideas
innovadoras. Eles poñen a paixón, nós os medios”.
Pola
súa banda, Juan C. Pichel, coordinador do Grao en Enxeñería
Informática da USC, e tamén membro do xurado, sumouse ás palabras
de Josefina sinalando a preparación que teñen os mozos hoxe en día:
“As universidades son centros de coñecemento que forman aos
futuros expertos e, como profesor, podo confirmar o gran nivel que
hai nas aulas. Para min é un orgullo ser parte deste xurado e poder
referendar o traballo destes estudantes, que son quen definirá a
sociedade o día de mañá”.
Esta
iniciativa forma parte do compromiso e aposta de Altia por potenciar
o talento no sector tecnolóxico e ser un actor crave na
modernización e dixitalización do ecosistema empresarial de
Galicia.