Alcatraz presenta novos servizos para o cumprimento das normativas sobre a protección de datos
xoves, 15 de marzo do 2012
Alcatraz
Solucións, empresa galega especializada en cumprimento normativo e máis en
protección do coñecemento, está a presentar estes días unha serie de novidades.
E faino con nova imaxe corporativa, cun acabado de estrear Programa de Canle,
con solucións e servizos para consolidar e incrementar a comunidade de partners, cunha plataforma para a xestión
chamada Panel de Control que optimiza o traballo cos compañeiros de negocio e
cun avance dos cambios lexislativos que virán da man da nova directiva europea
en materia de salvagarda da información.
Respecto á nova imaxe corporativa, dicir que LOPDGEST, nome da marca de produtos
co que se coñece a Alcatraz, pasa a ser unicamente o identificativo da súa liña
de negocio estrela: a gama LOPDGEST de servizos dirixidos en boa medida a
axudar a empresas a cumprir coa lexislación vixente sobre seguridade da
información persoal. Esta marca convértese en Alcatraz Solutions, cunha serie
de cambios que pretenden ir alén da Lei Orgánica de Protección de Datos (LOPD),
achegando un “amplo catálogo de solucións
e servizos ideado para chegar a un mercado potencial que en España acada os 1.300
millóns de euros neste ano 2012”.
No que atinxe ao novo Programa de Canle, dicir
que ten como principal elemento clave “a
especialización dos seus socios de negocio, unha comunidade de cincocentas
firmas e profesionais e que se espera chegue a 750 con este ano”. Co
obxectivo de facilitar as operacións con estes partners, Alcatraz desenvolveu unha plataforma de xestión (Panel de
Control) dende a que cada socio poderá xestionar o seu día a día en todo tipo
de procesos (xestionar os seus usuarios, facer pedidos e levar o seu
seguimento, facturas) así como acceder ao abano de servizos de Alcatraz
(inscrición en cursos, xestión da axenda, consultar produtos, acceder á area de
comunicación, ver notas de prensa, etc).
A maiores, a empresa galega pon en marcha
novas liñas para completar a súa oferta de asesoramento e formación, como AUDITGEST,
unha solución para facer auditorías de verificación de cumprimento sobre as
normativas acerca dos datos que ademais leva asociado un seguro de protección
de datos. Grazas a este servizo, informa a empresa galega, “os clientes estarán protexidos das sancións
ou gastos de defensa derivados dunha inspección da Axencia Española de Protección
de Datos, unhas sancións que poden chegar nestes intres aos 600.000 euros de
multa e que se espera, coa entrada en vigor da nova Directiva Europea, poidan
chegar ao millón de euros”. Outra das novas liñas abertas por Alcatraz,
dentro do seu eido formativo, é CAMPUSGEST, catálogo de formación a distancia,
e-learning, con máis de 25 cursos das
disciplinas profesionais máis demandadas e que contan co apoio da Fundación
Tripartita.