Akademia Project recruta estudantes de últimos cursos con espírito innovador
luns, 21 de setembro do 2015
A Universidade de
Santiago e a Fundación Innovación Bankinter están a presentar a
sétima entrega de Akademia
Project, un curso destinado (nas súas palabras) a estimular a
actitude innovadora e espetar o espírito emprendedor entre
estudantes das principais universidades. O curso, que abrangue
formativamente os elementos propios dun proceso completo de
innovación (contando co asesoramento de emprendedores, adestradores
e captadores de investimentos), inclúe
no seu programa unha aproximación ás tendencias actuais da
innovación e os seus detalles clave. Ao rematar, os
participantes poderán realizar prácticas en empresas estatais e
internacionais que apostan pola innovación.
Akademia Project, unha
iniciativa de balde, diríxese a estudantes de últimos cursos de
calquera titulación universitaria que concorreran en doce sesións
ao longo de todo o ano académico, catro delas reservadas para que o
alumnado desenvolva un proxecto emprendedor que será presentado na
sesión de clausura perante un xurado formado por expertos,
emprendedores e potenciais inversores.
Por certo que o día 6 de
outubro, ás 12.00 horas no salón de graos da Facultade de Farmacia,
está prevista unha sesión de presentación para todo o alumnado
interesado.
O curso desenvólvese en
diversas universidades de toda España, e no caso da institución
compostelá conta co apoio da Área de Valorización, Transferencia e
Emprendemento da USC (AVTE).
Os/as participantes aprenderán “dun
xeito colaborativo e moi participativo” a partir dunha metodoloxía
innovadora análoga á empregada polas mellores escolas de negocio do
mundo, explican dende a Universidade de Santiago, que engaden que do
93% do alumnado que ten pasado en edicións anteriores por esta
convocatoria, algo máis de 1.000 universitarios e universitarias de
titulacións diversas, recomendan esta iniciativa, “salientando que
Akademia lles ofrece ferramentas, conceptos e técnicas enfocadas á
innovación con independencia da rama de procedencia das persoas
interesadas”.