Agnix estrea nova face na Web

O colectivo Agnix vén de estrear face na Rede. A idea desta renovación é a que debería extraerse de debaixo de calquera renovación (mais non sempre ocorre así): mellorar a forma para que o contido chegue máis e mellor ós usuarios. Máis polo miúdo e segundo apuntan os responsables desta plataforma galega a prol da divulgación do software libre, o que se pretendía era acadar un deseño máis limpo, ancho e dinámico. Isto no que respecta á feitura. No que atinxe ós contidos (que gozan de novo xestor, da man de Drupal), tamén hai novidades, e moitas.
Para comezar, atopamos unha vontade de tirar partido ó máximo das fontes RSS co fin de “colleitar novas dos blogues dos editores e doutras fontes de información destacadas no eido tecnolóxico, sobor de todo libre”.
Sinalar que Agnix é unha asociación sen arela de lucro que naceu e medrou para poñer o software libre o máis preto posible dos galegos e galegas e, en virtude disto, traballar a prol da súa alfabetización dixital e dun acceso en mellores condicións á Rede e ós seus recursos. O traballo de anovación, que foi levado a cabo polo colectivo de xeito íntegro, vai dirixido tamén a reforzar a consecución do obxectivo devandito. Dito doutro xeito: as mensaxes escóitanse máis e mellor cun novo altofalante, e, se este está ben deseñado, mellor que mellor.
Parabéns en definitiva pola nova proposta ós nosos amigos de Agnix.