Afundación presenta o novo deseño da súa plataforma de contido audiovisual
luns, 15 de novembro do 2021
Afundación
presentou este 15 de novembro a
nova web de Afundación TV, unha remodelación da plataforma
audiovisual da entidade pertencente á Obra Social de Abanca que
destaca polos esforzos despregados en deseño (con amplas marxes de
interacción e accesibilidade) e en contidos (combinando a emisión
de audiovisuais cun catálogo de elementos que abrangue máis de 300
recursos dispoñíbeis, incluídas importantes novidades en
educación, cultura, envellecemento activo, medio ambiente e
sustentabilidade, que son os piares temáticos de Afundación TV).
A
nova Afundación TV mestura polo tanto a emisión lineal (24 horas, 7
días á semana) cun amplo abano de contidos gratuítos baixo demanda
e unha variada programación de eventos en directo. Amais, ofrece a
posibilidade de acceder á emisión continua de audiovisuais sen
necesidade de inscrición ou de rexistro. “Trátase dunha emisión
lineal, como a emisión televisiva tradicional, e un xeito moi
sinxelo de achegarse aos contidos de Afundación”, explican dende a
Obra Social de Abanca, engadindo que a nova páxina tamén ofrece a
posibilidade de crear unha conta persoal mediante a que acceder a
outras vantaxes:
•
A posibilidade de acceder ao catálogo de contidos á carta que conta
con máis de 300 recursos coma cursos, conferencias, sesións
prácticas, series, obradoiros, etc., clasificados nas categorías de
Arte e exposicións, Artes escénicas e musicais, Ciencia e medio
ambiente, Educación, IESIDE sen muros, Saúde e benestar e
Institucional.
•
A posibilidade de inscribirnos nos eventos en directo, como
conferencias ou concertos, e gardalos no calendario persoal, así
como de interactuar en directo cos protagonistas mediante un chat.
•
O acceso á área persoal A miña biblioteca, deseñada para
gardar e acceder facilmente os contidos que os usuarios desexen,
tanto se son contidos á carta como se son eventos en directo
programados a futuro.
•
A posibilidade de valorar ou compartir os contidos.