Aerocamaras mostra en DIC Galicia como axudar nos cultivos con drons
venres, 25 de maio do 2018
Desde
onte e até este sábado 26 de maio, estase a celebrar a segunda
entrega do Congreso Internacional de
Drons de Galicia, que acubilla no seu programa 20 mesas redondas
e relatorios e no que participan os máis importantes especialistas
estatais e internacionais nas tecnoloxías que acompañan e fan
posíbel os voos non tripulados. Entre as empresas con presenza en
DIC Galicia atópanse Aerocamaras,
que acode como relatora experta en aplicacións de drons en
agricultura. Na cita, que vén da man do COGITT-AGGETT (Colexio
Oficial e Asociación Galega de Graduados Enxeñeiros Técnicos de
Telecomunicacións), Aerocamaras mostra as posibilidades dos drons
para mellorar as explotacións agrícolas e gandeiras e protexer o
noso medio.
José
Daniel Ramos, de Aerocamaras, lembrou que hoxe é posíbel “usar os
drons para previr doenzas ou pragas nos cultivos, zonas agrícolas e
forestais, realizando a teledetección mediante fotografías aéreas,
feitas con vehículos aéreos non tripulados”.
Segundo
fixo saber, a través das imaxes de precisión e os datos xerados por
estas tecnoloxías aéreas, e mediante unha plataforma personalizada,
obtéñense ortofotos, MDT, MDS e nubes de puntos grazas ás que se
poden localizar as zonas afectadas polas doenzas ou as pragas e,
logo, mediante o emprego do dron Agras MG-1S, “tratar a área con
meirande precisión mediante unha pulverización de microgotas”.
Aerocamaras
tamén expuxo as vantaxes do emprego de aparellos aéreos fronte a
métodos tradicionais, entre as que se inclúen a “redución de
tempo e de custos en man de obra” e máis a posibilidade de cubrir
zonas remotas de difícil acceso e minimizar os cultivos danados.
Ademais,
Aerocamaras realizará este sábado ás 17 horas unha serie de
demostracións con diferentes tipos de drons, como o Agras MG-1S ou
o Matrice 600 Prol, mediante os que mostrará como se realiza unha
planificación de voo multiespectral sobre viñedos para a obtención
de fotografías. Logo, botando man do Agras, farase unha demostración
de pulverización sobre as supostas zonas afectadas. Posteriormente,
realizarase unha exposición estática do dron híbrido da empresa
galega con catro horas de autonomía, e máis do Safedrone, con novos
sensores fabricados por Aerocamaras.