Aerocamaras lanza AeroCovid, un sistema que asegura o distanciamento nas praias
martes, 9 de xuño do 2020
Co
comezo deste mes de xuño, a empresa ourensá Aerocamaras
e o Instituto Tecnolóxico de Galicia
(ITG) levaron ao seu remate o desenvolvemento conxunto dun sistema de
vixilancia baseado en Intelixencia Artificial (IA) que permite
controlar o aforamento nas praias: AeroCovid.
Trátase dunha tecnoloxía avanzada moi acaída para unha volta á
normalidade que coincide co inicio da tempada de verán e que obriga,
malia a relaxación dalgunhas restricións, a non baixar a garda en
materia de seguridade sanitaria, sobre todo alí onde se adoitan
xuntar grandes cantidades de xente, por exemplo en determinados
areais urbanos.
A
tecnoloxía de ITG e Aerocamaras intégrase en drons de última
xeración e ten a gran vantaxe de informarnos en tempo real sobre o
número de persoas que se atopan nun espazo público concreto, así
como a distancia que hai entre elas.
Concibido
para axudar aos concellos e ás forzas de seguridade locais,
AeroCovid realiza automaticamente o cálculo e a medición das
persoas en relación a un espazo determinado. A través do seu
algoritmo baseado en IA ten capacidade para obter resultados cunha
exactitude superior ao 90%, informaron Aerocamaras e o ITG, engadindo
que o sistema permite capturar audiovisuais en tempo real pero,
tamén, é quen de garantir a privacidade das persoas, “xa que as
imaxes dos individuos concretos desdebúxanse unha vez procesada a
información”, co que se asegura o o anonimato de quen estea no
espazo público avaliado.
Sistema
de seguridade pechado
Segundo
apuntan as empresas, outra das vantaxes de AeroCovid é que funciona
cun sistema de alta seguridade pechado, que evita os riscos relativos
á privacidade e a confidencialidade: “Os datos obtidos polo dron
procésanse a través do sistema que os pon a disposición do cliente
(policía local ou concello) mediante un panel online que pode
incluír, ademais, a recepción doutros datos externos, como a
temperatura ambiente, a temperatura do mar, ou o aforamento máximo
permitido nunha praia ou nun espazo determinado”.