Aerocamaras introduce no congreso Ecosystems2030 a gravación e retransmisión de imaxes con drons
venres, 3 de xuño do 2022
Entre
as empresas que participan no evento
Ecosystems2030 que está a celebrar a súa nova edición en
PALEXCO (A Coruña) atópase un dos grandes referentes galegos e
estatais en desenvolvemento e formación de drons: a firma
Aerocamaras. A empresa con sede
en Lalín cumpriu co seu cometido (avanzado nos días previos ao
inicio da cita) de retransmitir un “espectacular voo único en
directo polos interiores do recinto”. O vídeo da apertura do
congreso organizado por Wecom está xa
dispoñíbel en Vimeo.
Trátase,
en palabras de Aerocamaras, “dun exemplo práctico de como a
tecnoloxía dron está a revolucionar diferentes industrias e
sectores, como o audiovisual”. No caso concreto de Ecosystems2030,
foi a primeira vez que o evento contou con vehículos aéreos non
tripulados para gravar e transmitir en directo imaxes aéreas do
mesmo, no que, como lembraremos, participan representantes de
empresas tecnolóxicas tan punteiras como Google, Amazon, Samsung ou
Siemens.
Segundo
explica Aerocamaras, “os nosos drons despregaron todo o seu
potencial para inaugurar o evento realizando un adrenalínico
percorrido por PALEXCO e sorprendendo a todos os asistentes coas súas
manobras coándose polos interiores do emblemático edificio até
chegar á sala de congreso”.
Jaime
Pereira, director executivo de Aerocamaras, sinalou que o labor
despregado polos vehículos aéreos da empresa baseouse na nova
tecnoloxía FPV, que permite gravar os voos aéreos con visión en
primeira persoa. “Como patrocinadores do Ecosystems 2030 quixemos
sorprender a todos os asistentes cun espectacular percorrido en
directo polo exterior e interior de PALEXCO”, conclúe.