Advirten de novos e ambiciosos ataques de EE UU e a Unión Europea contra a neutralidade da Rede
venres, 31 de xaneiro do 2014
Por se fosen poucos os
problemas que hai no mundo, agora resulta que Internet volve estar en
perigo. Así nolo contan hoxe os activistas da plataforma Avaaz.org,
que sinalan que coa Rede pode pasar o mesmo que coa riqueza: que cada
vez haberá máis cantidade destas cousas (de Internet e de cartos)
en mans de menos persoas e entidades. Para a plataforma a cousa está
clara: hai riscos de que o 1% da poboación máis rica do planeta
controle a partir de agora e para sempre todo o que cada un de nós
ve por Internet. A situación, en certa maneira, víase vir. Hai
moita xente con poder que ve na Internet o peor dos pesadelos para os
seus intereses: os internautas ollan cara eles co lupa e mesmo teñen
o atrevemento de facer fronte común en contra dos seus abusos.
Segundo informa Avaaz,
Estados Unidos e a Unión Europea están a piques de permitir que as
corporacións máis ricas ofrezan os seus contidos máis rápido
mentres impoñen barreiras ou retardan os de todos aqueles que non
poidan pagar por obter as dicir vantaxes. “Isto”, explícase,
“faría perigar cousas como a capacidade de Avaaz de difundir
imaxes gravadas por xornalistas cidadáns desde Siria ou de lanzar
campañas para salvar o noso planeta”.
Ante estas pretensións
do poder, lembra a plataforma, xa hai xente que está a pechar
fileiras para facerlle fronte en ámbalas beiras do Atlántico:
pioneiros da tecnoloxía, defensores da liberdade de expresión, e
algunhas das máis destacadas compañías web. Moitos deles xuntan
forzas precisamente en Avaaz, a
través dunha campaña específica xa posta en marcha e aberta á
achega de sinaturas. Os expertos cualifican a ofensiva que
denuncian os ciberactivistas como un claro ataque á neutralidade da
Rede. Até o de agora, lembran, esta neutralidade estaba protexida
por lei en Estados Unidos, “pero un tribunal vén de botar a
lexislación abaixo, cousa que tamén pretende facer o Parlamento
Europeo, que ameaza con aprobar un novo regulamento daría aos
provedores de servizos de Internet (ou ISPs) o dereito a repartirse a
Rede e controlar o que vemos, retardando as páxinas ou facéndonos
pagar por acceder a sitios web”.