Achégase en español FreetoDownload.org con máis de 1.500 programas abertos en libre descarga
mércores, 3 de xuño do 2015
PortalProgramas
vén de anunciar a posta en marcha no ámbito estatal, cunha web
propia en español, dun proxecto social transfronteirizo
destinado a subir novos chanzos na promoción do software libre. O
proxecto chámase FreeToDownload.org
e máis que promover encamíñase directamente a espallar a esgalla
programas e recursos de programación aberta, tirando abaixo as
posíbeis barreiras que poidan ficar aínda en pé entre quen oferta
e quen demanda open source. O novo sitio en español abrangue
a cifra nada desprezábel de máis de 1.500 programas sen
restricións, aos que cómpre engadir 1.000 alternativas a programas
propietarios, sobre todo para Windows aínda que tamén para Mac,
Android e iPhone. O obxectivo dos seus responsábeis é converter o
portal na maior plataforma mundial de difusión e distribución de
software libre.
Para acadalo, a
metodoloxía pola que apostan é a da sinxeleza absoluta. Ou sexa,
que podemos baixar programas de xeito doado e rápido: ben co
buscador ou directamente navegando polas ducias de categorías que se
fornecen. Ademais, os impulsores da plataforma levaron até o extremo
o seu compromiso de apostar por linguaxes claras e accesíbeis,
evitando o emprego de tecnicismos.
Unha das funcionalidades
máis interesantes é que permite atopar alternativas libres a
programas pechados, co que poderemos saber que recursos abertos
concretos nos achegan semellantes servizos cós propietarios.
FreeToDownload, sinalan
dende PortalProgramas, é tamén unha maneira de introducir aos
usuarios no mundo da programación aberta e a filosofía que ten
detrás. Segundo Benjamin Segura, responsable do sitio, “o software
libre ten un gran potencial, e necesitabamos facer máis para axudar
a promovelo entre os usuarios”. Con FreeToDownload, engade,
“desenvolvemos unha plataforma para descargar software de calidade
e ademais gratuíto; estamos seguros de que animará aos usuarios a
usar programas abertos”.