Abre o prazo para presentar a proxectos á OSHWDem2020, que este ano celébrase en liña
mércores, 9 de setembro do 2020
Os
grandes acontecementos tecnolóxicos da nosa terra veñen este ano
marcados polas esixencias da actual situación sanitaria, e, malia
que algúns non lles quedou outra vía que cancelarse ou adiarse,
outros están a optar pola vía online e por tirar proveito da
actividade xerada nas redes polas comunidades que lles dan sustento e
apoio. É o caso (este último) da
feira maker OSHWDem da Coruña, que este ano 2020 terá
lugar en formato en liña. Será o 7 de novembro. Segundo puidemos
saber, a
organización está mobilizando as concorridas fileiras de
argalleiras e argalleiros da nosa terra e do ámbito estatal e
internacional para lucir proxectos no marco do dito evento. Terán
cabida, como cada ano, contribucións tecnolóxicas ligadas á
educación, a robótica, as comunicacións, a música, a arte e a
impresión 3D.
Segundo
detalla o grupo de impulsores da OSHWDem “buscamos e daremos
preferencia a proxectos baseados en tecnoloxías abertas, canto máis
abertas, mellor. Valoramos tamén o grao de innovación do proxecto,
a calidade da súa documentación, a súa comunidade e, en xeral,
calquera aspecto que o faga interesante para a OSHWDem”.
De
feito, neste intre xa está aberto o Call4Makers, polo que xa
é posíbel presentar contribucións acompañándoas da información
complementaria sobre a súa natureza e os seus obxectivos, e máis
dun formulario de datos persoais para que a organización poida
poñerse en contacto cos makers.