Aberto o prazo de matrícula para os cursos de informática da UDC

A Aula de Formación Informática (AFI) da Universidade da Coruña (UDC) presentou o calendario de cursos para o último trimestre do ano 2006. O prazo de matrícula xa está aberto e os interesados deberán dirixirse antes do día 12 de outubro (11 de outubro para as persoas alleas á universidade) á secretaría da AFI de luns a xoves en horario de 17:30 a 19:30 horas ou ben reservar praza na web do dito departamento.
A oferta deste curso académico conta cun total de 21 actividades, ben dirixidas cara a un público amplo con contidos como os procesadores de texto, os sistemas operativos Windows e Linux, follas de cálculo, bases de datos... ou ben con contidos máis específicos como programación en Java 2, plataforma .Net 2.0, desenvolvemento de software con ferramentas Case ou gráficos e métodos numéricos en Matlab.
O prezo dos cursos varía entre os 60 euros que deberán pagar os membros da UDC e os 120 euros, que deberán pagar as persoas alleas. Por outra banda, a duración dos mesmos será na maioría dos casos de 20 horas, mentres que as datas e os horarios son variables. As prazas para profesorado, persoal de administración, servizos e alumnado sortearanse publicamente o día 13 de outubro ás 11 da mañá na AFI. Para máis información, os interesados deberán dirixirse á web da Aula de Formación Informática da Universidade da Coruña.