Abanca estrea en Vigo a súa oficina empresarial “de última xeración”
venres, 15 de abril do 2016
Abanca
presentou onte a súa nova oficina de empresas en Vigo, en si
mesma unha materialización do modelo “ideal” de oficina
innovadora que ten a entidade galega para os anos vindeiros. O
obxectivo das novas dependencias, segundo se fixo saber, é mellorar
ao máximo a atención aos clientes do ámbito corporativo, achegando
“unha meirande especialización e elementos tecnolóxicos de última
xeración”. A oficina, emprazada no baixo da sede institucional do
banco en Vigo, conta cun equipo de trece profesionais. Abrangue máis
de 300 metros cadrados e amosa unha disposición sen barreiras
artellada en catro eixes: distribución, xestión comercial
especializada, asesoramento e back office. A atención ao
cliente concéntrase na zona de asesoramento, con catro salas de
reunións. Segundo informou Abanca, o novo espazo “está dotado co
equipamento e funcionalidades tecnolóxicas máis innovadoras do
mercado, que facilitan a mobilidade dos xestores e reducen tempos de
espera e procesos”.
Desta maneira, nas dependencias inauguradas todos os
axentes-profesionais contan con tabletas Microsoft Surface,
dispositivos de traballo con funcionalidade de PC que permiten, en
palabras de Abanca, “atender ao cliente en calquera lugar, mesmo na
súa propia empresa”. Segundo fixo saber a entidade financeira na
presentación, a oficina de empresas de Vigo é a primeira de Abanca
adaptada ao novo modelo de oficina que procura a compañía para os
anos vindeiros: un espazo moi envorcado coas TIC e acaído para
asegurar a calidade do servizo ao cliente “a través de solucións
tecnolóxicas de última xeración, amplos espazos abertos (non hai
mostradores nin despachos) e zonas diferenciadas en función do
servizo que se preste ao cliente”.
Ademais, o novo artellamento das oficinas da
entidade financeira galega obedece “a un modelo de relación co
cliente máis funcional, próximo, innovador, eficiente e
sustentábel”, fixeron saber os responsábeis de Abanca no acto de
inauguración oficial, no que participaron, por certo, máis de 200
empresarios de Vigo e contorna, acompañados polos principais
directivos de Abanca e distintos cargos da área de empresas da
entidade. Durante a sesión, o vicepresidente da entidade, Juan
Carlos Escotet, salientou que “as empresas son un segmento de
negocio prioritario e ímoslles dar un impulso durante este ano”. E
engadiu: “Queremos seguir sendo o principal aliado do tecido
empresarial galego apoiándoo, principalmente a través do
financiamento, tanto no seu día a día coma nos seus proxectos de
crecemento e expansión internacional”.
Pola súa banda, o conselleiro delegado, Francisco
Botas, anunciou que “o plan de impulso á empresa que deseñou a
entidade para 2016 abrangue crecementos de dous díxitos tanto en
financiamento de circulante coma en préstamos a longo prazo para
apoiar novos proxectos de investimento”. Segundo fixo saber, “para
desenvolver este plan contamos con dous elementos diferenciais no
mercado: a nosa especialización e coñecemento do tecido empresarial
galego e a capilaridade da nosa rede de oficinas, a maior de
Galicia”. Respecto do plan de negocio de Abanca, engadiron que
abrangue un obxectivo de concesión de 11.000 millóns de euros en
novo crédito para a empresa durante os vindeiros tres anos. Ademais,
fixeron saber que a entidade financeira financia ao 61% das PEME e
empresas galegas con débeda bancaria, “e suma 12.900 millóns de
euros na súa carteira de investimento empresarial”.