ANSGAL quere converter a nosa terra nun referente en comunicación avanzada a través de satélites multiórbita
luns, 7 de xuño do 2021
A
empresa ourensá EGATEL,
con sede no Parque Tecnolóxico de Galicia, lidera un consorcio dunha
ducia de entidades do sector tecnolóxico e universitario para facer
realidade un paso de xigante na industria aeroespacial galega e, por
extensión, tamén na estatal. Estamos a falar do proxecto
ANSGAL (A New Space por Galicia), abeirado ao Programa de Impulso de
Proxectos Tractores de Competitividade e Sustentabilidade Industrial,
que forma parte do Plan de Recuperación do Goberno para a
repartición dos fondos europeos Next Generation. Baséase no
desenvolvemento dun polo industrial que sitúe como eixe de atracción
de talento, empresas e investimento, focalizado no fornecemento de
servizos integrais e avanzados de comunicación a través de
satélites multiórbita.
O
obxectivo é dar servizo a sectores prioritarios como o das
telecomunicacións, o marítimo ou o agroalimentario. A estimación
da empresa galega é xerar preto de 7.000 postos de traballo entre
emprego directo e indirecto ao longo dos tres anos seguintes ao
arrinque do programa.
As
organizacións que forman parte do proxecto ANSGAL son: EGATEL,
Hispasat, Cellnex, Alén Space, UARX Space, Manufactura de Ingenios
Tecnológicos, Imatia Innovation, Fundación Centro Tecnolóxico de
Telecomunicacións de Galicia (Gradiant), Universidade de Vigo,
GII/UDC e Centro Tecnolóxico do Mar.
A
primeira fase do proxecto centraríase en desenvolvementos como o
despregue dunha rede de pequenos satélites (Constelación Sayari),
definidos por software, así como no deseño e fabricación dun
vehículo espacial con capacidade para poñer en voo pequenos
satélites nas súas correspondentes órbitas “coas máximas
fiabilidade e eficiencia”. O primeiro treito da ANSGAL tamén
incorpora o deseño, desenvolvemento e posta en servizo dunha rede de
comunicacións 5G que habilite a investigación, o desenvolvemento e
a experimentación de novas solucións e casos de uso ou o impulso
das tecnoloxías de comunicacións cuánticas no espazo.
