AMTEGA publica unha guía de boas prácticas para a liberación de coñecemento dende a Administración
luns, 31 de marzo do 2014
A Axencia para a
Modernización Tecnolóxica de Galicia, AMTEGA, anunciou estes días
a
publicación dun manual de uso sobre coñecemento aberto e software
libre aplicado á información xerada pola Administración
autonómica. Ademais, a Guía de boas prácticas para a
Liberación de Publicacións da Xunta de Galicia incide nas moitas
vantaxes e beneficios que implica empregar formatos abertos e
licenzas libres nas devanditas achegas de información. Lembrar que a
guía presentouse o pasado 26 de marzo, coincidindo co Día
Internacional da Liberdade
de
Documentos (DFD).
Esta celebración,
impulsada pola organización Free Software Foundation Europe, tivo
reflexo na nosa terra nunha xornada promovida por GALpon na
Universidade de Vigo que serviu entre outras cousas para pór de
relevo a necesidade de liberar documentación académica, de
investigación e, no caso do Goberno galego, institucional e
administrativa. Na xornada participou, entre outros relatores, Juan
Víctor Rodríguez Arós, xefe do Departamento de Innovación
Tecnolóxica da Axencia para a Modernización Tecnolóxica de Galicia
(AMTEGA), quen achegou o devandito compromiso coa filosofía do open
data da axencia. Deste compromiso xorde precisamente a guía, que
estará dispoñíbel nas webs de AMTEGA e Mancomún.
Por certo que AMTEGA
tamén quixo celebrar o DFD con outra das asociacións referenciais
galegas en materia de software libre, GPUL, que
organizou unha xornada de traballo e divulgación análoga na
Facultade de Informática da Coruña.
Volvendo á guía, a
axencia sinala que recolle os resultados de diversas accións
formativas dentro da Administración realizadas en 2013 de cara a
fomentar a publicación baixo licenzas libres dos contidos editados
pola Xunta de Galicia, así como a súa reutilización e difusión.
“O documento”, engade AMTEGA, “incorpora recomendacións sobre
sobre a xestión da propiedade intelectual no proceso desenvolvemento
das obras, analiza os diferentes tipos de licenciamento mediante
licenzas libres e finalmente inclúe recomendacións de formato e
ferramentas en software libre para o traballo con documentos de
texto, imaxes, vídeos e obras sonoras”.