AMTEGA amosa a súa implicación na Xornada de Informática Xudicial do CPETIG
luns, 20 de abril do 2015
O
Colexio Profesional de Enxeñaría Técnica en Informática de
Galicia (CPETIG) vai
contar coa colaboración da Axencia para a Modernización Tecnolóxica
de Galicia (AMTEGA) na organización e o desenvolvemento da
quinta Xornada de Informática Xudicial, un dos eventos máis
importantes (a nivel galego e estatal) arredor dunha temática que
gaña interese e implicacións con cada día que pasa: a
interrelación entre as novas tecnoloxías da información e os
ámbitos de traballo xudiciais, policiais e legais.
AMTEGA
amosou este sábado 18 a súa plena colaboración na Xornada (punto
de encontro para todos os interlocutores do eido xudicial, galegos e
estatais, dende unha óptica TIC), durante a sinatura dun acordo
formalizado entre a súa directora, Mar Pereira, e o presidente do
CPETIG, Marcos Jaime Mata. O convenio abrangue actividades formativas
sobre protección de datos, eAdministración e a celebración do
Scratch Day.
Segundo
se fixo saber, a nova edición da Xornada porá á disposición dos
profesionais do ámbito xudicial de Galicia (maxistrados, xuíces,
avogados, fiscais, etc.), relatorios de expertos sobre os últimos
avances e ferramentas na investigación dos delitos informáticos así
como á presentación de casos concretos. Asemade, sinalouse,
“permitirá coñecer de primeira man detalles relacionados coa
loita contra os delitos informáticos, no ámbito policial e
xudicial, e a evolución que están a seguir”.
O
convenio prevé tamén a celebración de dous seminarios sobre
protección de datos e eAdministración para informar sobre os
aspectos máis relevantes da normativa de protección de datos e da
administración electrónica xudicial, así como dos beneficios da
incorporación e o uso das novas tecnoloxías nos procesos xudiciais.
O CPETIG tamén organizará o evento Scratch Day, unha xornada con
diferentes actividades en torno a esta ferramenta informática
con especial potencial para as novas xeracións que comecen a dar os
seus primeiros pasos en programación, e que permite aos usuarios
programar historias interactivas, xogos e animacións, e compartilas
en liña con outros membros da comunidade.
A
Axencia para a Modernización Tecnolóxica de Galicia achegará ao
Colexio Profesional de Enxeñaría Técnica en Informática de
Galicia 34.000 euros para o desenvolvemento das actuacións que se
recollen no acordo.