AMI sostén que o canon dixital prexudica a catro millóns de músicos vinculados á Rede e á cultura libre

A Asociación de Música en Internet (AMI) vén de avaliar até onde chega o dano que lles está a causar ós artistas vinculados á Rede a imposición do canon dixital que propicia a SGAE co apoio do Goberno central. Segundo o estudo da AMI, hoxe en día hai catro millóns de músicos que promoven as súas creacións a través das novas tecnoloxías (desvinculados das sociedades tradicionais de xestión de dereitos) e que ven na devandita taxa un importante obstáculo para a distribución da súa música e a xestión das súas licenzas de xeito independente, baixo Copyleft (Creative Commons).
Segundo engade a AMI, estes músicos apostan de xeito decidido pola Rede e pola distribución das súas cancións de balde, sendo estas as súas tarxetas de presentación perante os afeccionados de todo o mundo e os concertos a súa principal fonte de ingresos. Para estes colectivos (que están a medrar de xeito considerable, arredor do concepto de cultura libre), a “imposición do canon en calquera servizo ou produto dixital, informático ou telemático que encareza a descarga da mesma para o usuario non pode ser ben acollido, xa que merma a súa divulgación prexudicando o medio de financiamento, que é a venda de entradas para os concertos.” Ou sexa: o canon encarece os soportes e impide a propagación a través da copia da súa peza musical.