AGADIC e o Gaiás poñen en marcha un espazo de coworking para profesionais da cultura e das comunicacións
venres, 7 de decembro do 2012
A Cidade
da Cultura de Galicia e a axencia AGADIC
están a pór en marcha un espazo físico e virtual de traballo
destinado a profesionais do sector da cultura galega. Chámase
Emprende Cultura Gaiás, e está situado
no Centro de Emprendemento Cultural e Creativo de Galicia. Este
escenario de coworking encamíñase,
máis polo miúdo, a achegarlles aos profesionais unha serie de
recursos de uso común para o seu labor, entre os que se conta unha
rede de contactos de seu, un programa especial de formación e máis
unha serie de canles para presentar proposta e ideas ante as empresas
do sector. Este espazo preséntase este mes de decembro en dúas
quendas, o 11 e o 13 de decembro ás 17.00 horas, abranguéndose
visitas ao emprazamento do proxecto e presentación do mesmo.
Trátase, en total de vinte postos de
traballo a un prezo de 120 euros máis IVE cada que, entre outras
cousas, inclúe o dereito a empregalo de 8 a 22 horas, de luns a
sábado, todo o ano.
Ofrécese, ademais dos servizos básicos
(mesa de traballo, cadeira, estante, conexión a internet de alta
capacidade, conexión telefónica, caixa de correo, armario persoal
con chave, subministro eléctrico, auga e calefacción), “a
posibilidade de dispor dunha sala de reunións de grupos equipada con
acceso Wi-Fi e proxector e dunha dunha sala-despacho”, informan
AGADIC e a Cidade da Cultura.
A estes emprazamentos
profesionais, engaden, poden optar representantes das industrias
culturais: deseñadores-ilustradores, profesionais da comunicación,
escritores, editores, representantes e promotores artísticos,
produtores, xestores culturais, programación de aplicacións
informáticas e proxectos culturais na Internet, arquitectos e
aqueles outros con vinculación no emprendurismo cultural.
Poderán admitirse profesionais independentes ou emprendedores que se
atopen en proceso de constitución de autónomos, sinálase.
Para solicitar un posto no espazo de coworking
é preciso realizar a solicitude antes
do vindeiro 30 de decembro na web
AGADIC, acompañada dunha memoria do proxecto a desenvolver.