A xira sobre transformación empresarial de GAIN e o IGAPE fai parada en Arzúa
luns, 11 de abril do 2022
A
directora da Axencia Galega de Innovación (GAIN), Patricia
Argerey, e o director do IGAPE, Fernando Guldrís, estiveron este
luns 11 en Arzúa ao abeiro dunha das paradas estratéxicas da
iniciativa itinerante Camiño de futuro, posta en marcha
co obxectivo de difundir entre as pequenas e medianas empresas de
contornas non urbanas os instrumentos de apoio autonómicos para
medrar e mellorar a competitividade.
No
encontro celebrado en Arzúa técnicos de GAIN e do IGAPE, así como
do Grupo de Desolvemento Rural (GDR) Ulla, Tambre e Mandeo,
explicaron as diferentes convocatorias de axuda activadas pola
Administración galega.
Así,
entre outras iniciativas e convocatorias, informouse de que dentro do
Programa de Impulso á Innovación nas Pemes, activaranse este ano
apoios por 12 millóns de euros. Tamén se puxo o foco no ámbito da
dixitalización, onde se insiren convocatorias, neste segundo
trimestre do ano, que suman 7 millóns de euros, coa previsión de
mobilizar 13 millóns.
No
ámbito do emprendemento, explicouse que no segundo trimestre do ano
está previsto convocar as axudas do programa Galicia Emprende, con 5
millóns de euros, que se suman ao Galicia Rural Emprende, con 2
millóns de euros, que xa se convocou.
Nun
plano máis concreto, debulláronse as posibilidades da Oficina
Galicia Empresa, desde a que a Xunta atende ás empresas e aos novos
proxectos empresariais que se queren asentar en Galicia, onde toman
partido todos os departamentos da Administración autonómica. O
obxectivo é “facilitar o camiño aos emprendedores e ás empresas
que queren desenvolver os seus proxectos en Galicia, restando tempos,
carga burocrática e duplicidades na tramitación”.
A
xornada contou cunha mesa redonda de casos de éxito empresarial con
pemes innovadoras da contorna procedentes de distintos sectores, que
falaron da súa experiencia como beneficiarios de distintos
instrumentos de apoio da Administración. Neste caso, a cita con
compañías innovadoras reuniu ás empresas Indupanel (Cerceda),
líder español na fabricación de paneis de aluminio e PVC, e Toldos
Gómez (Arzúa), referente na fabricación de lonas e carpas.
En
total, Camiño de futuro acolle 14 encontros de networking
por toda a xeografía galega. A seguinte parada terá lugar o martes
19 de abril en Ortigueira.