A xestión de arquivos centra un curso con prácticas empresariais do Concello da Coruña
martes, 24 de maio do 2022
O
Concello da Coruña, a través da Concellaría
de Educación, Memoria Histórica, Innovación, Industria e Emprego,
achega esta tempada un curso sobre xestión de arquivos para
persoas desempregadas con especiais dificultades para atopar emprego.
A acción formativa enmárcase no proxecto Coruña
Suma (AP-POEFE), iniciativa de inserción laboral co-financiada
polo Fondo Social Europeo.
As
accións formativas a desenvolver este ano no proxecto Coruña Suma
(AP-POEFE) céntranse en 4 áreas principais: administración e
xestión, informática e comunicacións, atención a persoas
dependentes e hostalaría e turismo.
O
curso de xestión de arquivos enmárcase na rama de administración e
xestión e ten como obxectivo “aprender a realizar operacións de
xestión administrativa e de arquivo e documentación da información
mediante soportes convencionais e informáticos”. As clases
comezarán o vindeiro martes 24 de maio e teñen previsto finalizar o
18 de xullo, o que equivale a dous meses de formación. Esta
impartirase de luns a venres en horario de mañá, de 9.30 h a 14.30
h, e ten un total de 15 prazas dispoñíbeis. A formación, que é de
balde, oferta un total de 80 horas prácticas de empresa, permitindo
a posibilidade de poñer en práctica as habilidades adquiridas na
fase teórica.
O
pasado xoves 19 de maio iniciouse outro curso formativo no marco do
proxecto Coruña Suma. Na rama de informática e comunicacións
iniciouse o curso de xestión comercial de clientes con novas
tecnoloxías, unha formación de 185 horas de duración na súa parte
teórica e 40 horas na parte práctica. Dende a o 19 de maio ata o 15
de xullo impartirase a fase práctica, de luns a venres en horario de
tarde (de 15.30 h a 20.30 h). Esta formación tamén é gratuíta e
dispón dun total de 15 prazas.