A web médica participada por Telefónica, a máis votada do eido da eSaúde
luns, 11 de xaneiro do 2016
A comunidade médica
dixital Saluspot, participada
por Telefónica, resultou ser a web de saúde máis votada polos
internautas do ámbito estatal. Segundo informa a operadora, o
recoñecemento materializouse na edición española dos premios
Website do Ano, destinados a salientar a páxinas máis referenciais
da contorna estatal. Máis polo miúdo, Saluspot
obtivo o 26,6 % dos votos dentro da súa categoría.
Amais de acadar o premio
Website Máis Popular do Ano, Saluspot obtivo unha cualificación de
sobresaínte en deseño, contido, navegación e intención de
recomendación. Gonzalo Castellano, director executivo da empresa
dixital (que se presentou por primeira vez como candidata nos ditos
galardóns) sinalou que o premio é un xeito de destacar “o moito
que traballamos no último ano para espallarnos en novos países,
chegarmos a máis persoas, resolver máis dúbidas de saúde e
achegar ferramentas (páxina, plataforma e aplicación) mellores e
máis accesíbeis para teléfonos móbiles”.
Lembrar que o galardón
Website do Ano estableceuse como un premio transeuropeo con preto de
3 millóns de votos en todo o mundo. Elixe os mellores e máis
populares sitios en liña en 19 categorías diferentes. A elección
lévase cabo en 9 países: España, Reino Unido, Francia, Alemaña,
Holanda, Italia, Brasil, China e India.
Recordar que Saluspot é
unha comunidade en liña interactiva de saúde formada por usuarios,
profesionais sanitarios e centros médicos. Naceu en 2011 co
obxectivo de combater “a desinformación médica en Internet”,
axudando “a mellorar a saúde das persoas con respostas fiábeis”.
A empresa conta cunha participación estratéxica de Telefónica.