A web galega Ghastas Pista, cumpre dez anos
luns, 18 de maio do 2009
Que galego ou galega (coñecedor ou non do
batifondo nocturno da vila coruñesa de Santa Comba) non ten escoitado algunha
vez a expresión “ghastas pista?” que
usan moitos asíduos as discotecas xalleiras para convidar a bailar ás mozas e
mozos do lugar? Pois ben, o éxito desa expresión tan peculiar e descritiva do
acento da bisbarra do Xallas (que naceu alá pola década dos noventa) foi tal,
que Ghastas
Pista? non tardou en chegar á Rede e converterse nunha web centrada
principalmente na música folk e tradicional da nosa terra, que hoxe mesmo
cumpre xa 10 anos.
A páxina, que ao longo desta década tamén
nos achegou outros estilos alén da música popular galega, tiña como única
condición que as cancións estiveran na nosa língua, algo que aínda hoxe segue a
respectar minuciosamente.
Asemade, esta web, que nos últimos anos
foi ampliando os seus contidos con vídeos, listaxes de locais, programas de
radio, lugares onde asistir a clases ou eventos nos que os afeccionados a esta
música podían disfrutar dela en vivo e en directo, presenta agora información
sobre novidades discográficas editadas tanto dentro como fóra de Galicia, así
como traballos históricos xa descatalogados de enorme interese para os
visitantes.
A web tamén contén agora unha sección
aberta a tódolos internautas na que se poden informar e debater sobre a
actualidade musical galega do momento e que ofrece un maior dinamismo e
interacción entre os usuarios, que agora teñen a oportunidade de coñecer xente
con similares gustos musicais e afeccións sen sair da aplicación.
Este portal, que naceu co obxectivo firme
de dar a coñecer as novidades musicais do país, disponse a dar un paso máis alá
e converterse non só nun punto de información, senón tamén nun lugar de
encontro entre os que levan xa abonda “pista
ghastada” e os que debecen por comezar a “ghastala” ao son da música galega.