A web do CCG convoca a autores e investigadores para dar conta da traxectoria vital de Ramón Piñeiro

Piñeiro nunha fotografía da súa viaxe aos Estados Unidos da Fundación Carlos Casares

A web Consello da Cultura Galega (CCG) converteuse (como cada ano por estas datas) nun recurso de obrigada visita perante a máis que inminente festividade dupla das nosas Letras e de Internet (o 17 de maio). As achegas en liña do CCG sobre a traxectoria do escritor, mestre e político Ramón Piñeiro (festexado este ano na devandita data) sitúanse alén da documentación exhaustiva e multimedia sobre un autor concreto do noso tempo e da nosa terra, posto que tamén teñen un aquel de recoñecemento da cultura que o viu nacer no espazo que lle corresponde da Rede: toda ela. Isto conségueo a páxina do CCG a través de varios camiños fundamentais. Primeiro: o subministro constante de contidos (novas, artigos das persoas que o coñeceron, reportaxes) sobre Piñeiro e todo o relativo á súa persoa ao longo dos días previos á festividade do 17, facendo fincapé en todo intre no representativo que é o homenaxeado do acontecido na nosa terra ao longo do século XX. Segundo: o aproveitamento das posibilidades da Internet de hoxe como aparello multicanle, completando a achega de textos con galerías de imaxes sobre o autor e o seu contorno, arquivos sonoros coa voz de Piñeiro ou escolmas gráficas da súa produción bibliográfica.
A web habilitada con este fin, centrada en boa medida en acurtar as distancias entre os internautas e a obra bibliográfica do escritor-investigador de Láncara (incluíndo un rastrexo detallado abondo sobre aquilo que podemos atopar nas librerías), é un espazo en liña a moitas voces: semella que se quixo convocar o máximo número de representantes da nosa cultura o coñeceron. Nesta liña é paradigmática a crónica que ofrece estes días a web sobre a mesa camilla, centro de operacións do Piñeiro máis comprometido, situada na rúa Xelmírez de Compostela, e imán de promesas da cultura galega que estaba por vir. O artigo en cuestión, centrado nunha mesa camilla para dar corpo ante os ollos do lector-internauta a unha persoa (a do seu dono), resume coa súa reunión de voces e memorias (Isaac Díaz Pardo, Francisco Fernández del Riego, Xosé Luís Franco Grande, Helena Villar e Andrés Torres Queiruga) a arela dos responsables da web: crear un referente plural, como un caderno colectivo, sobre a figura de Piñeiro.