A web da Xunta superou os 11 millóns de visitas en 2010
luns, 7 de febreiro do 2011
O ano 2010
quedará para a prosperidade como o ano das redes sociais en Internet, o ano da
proliferación destas ferramentas que nos axudan a estar en permanente contacto
cos nosos familiares e amigos malia que estén a milleiros de quilómetros de
distancia.
Estas
aplicacións virtuais foron gañando terreo na Rede ata converterse en
referencias imprescindibles para empresas e entidades privadas, así como para as
administracións públicas, que atopan nas redes sociais unha canle xeitosa para
comunicarse coa cidadanía (sobre todo coa máis moza).
A Xunta, sen ir
máis lonxe, ten presenza dende o pasado ano en Facebook e Twitter, con preto de
1.500 seguidores en total. Coa incorporación a estes espazos a Administración
autonómica busca, segundo informou, “aproximarse
ao concepto de Open Government, unha Administración na que priman as relacións coa
cidadanía e o contacto directo con ela, máis transparente, participativa e
colaborativa”.
Pola súa banda,
a web da Xunta de Galicia, que no pasado mes de xuño iniciaba unha nova andaina
converténdose nun espazo máis intuitivo e accesible, recibiu durante o ano 2010
un total de 11,6 millóns de visitas das que 350.000 foron realizadas por
usuarios distintos.
A nova web foi
concibida pensando en mellorar a atención ao usuario, incrementando nos últimos
meses os servizos dispoñibles, ofrecendo unha maior interactividade, novas
canles multimedia e o acceso a través das redes sociais; trátase, en
definitiva, unha aposta pola web 2.0.
A incorporación
de novos servizos ao portal da Xunta resposta ao obxectivo de avanzar no
concepto de administración electrónica, convertendo a web institucional nunha
porta de entrada única onde o usuario poida acceder á información dunha forma
moito máis clara.
Asemade, ao
longo dos últimos meses foron incorporándose novidades ao portal como os servizos para notificar as axudas
e subvencións por correo electrónico e sms aos cidadáns.
Este servizo,
que dende a súa posta en marcha xa dou servizo a máis de 400 usuarios, permite
acceder de balde a toda a información publicada en materia de axudas e subvencións,
á que se accede logo de ter recibido un avisa por parte da entidade pública.
Seguindo uns
sinxelos pasos o usuario pode elixir o colectivo que máis se axuste ao seu
perfil e as áreas temáticas que lle resulten de maior interese, e o sistema
analizara a diario as novidades que se produzan no catálogo de procedementos e,
en función do perfil e áreas temáticas que fosen seleccionadas polo usuario,
envía un resumo coa información que se axuste a estas preferencias.
Outra das
melloras da web foi a posta en marcha do servizo, Canle Axudas, a
través do cal se recollen de forma doada e intuitiva todas as axudas e
subvencións que fosen catalogadas na Guía do Cidadán. A través dun buscador o
cidadán pode atopar as axudas de maior interese para o seu perfil de usuario ou
para as áreas temáticas do seu interese. Esta canle incorpora diferentes
pestanas nas que se clasificarán en catro categorías os novos procedementos
publicados: Novidades, Máis consultados,
Últimos días e Abertos.
A reorganización
de contidos levada a cabo na web facilita aos usuarios o acceso a 350 ligazóns
distintas ordenadas e clasificadas por colectivos, temas e servizos.
Precisamente, un dos cambios máis significativos na estrutura da web foi o
acceso á información a través de epígrafes de colectivos. Un total de 20 grupos
nos que se integra a información que hai en todos os portais da Xunta que pode
ser de interese para ese colectivo.
Deste xeito,
empresas, traballadores, desempregados, maiores e mozos, entre outros, poden
acceder a través dunha única ligazón evitando a busca da información por
departamentos.