A web antidesafiuzamentos Doafund colle corpo a través da lanzadeira UEIA
martes, 4 de decembro do 2012
O ritmo dos desafiuzamentos pode que
baixe coa presión social e coas máis ou menos drásticas medidas
das administracións (de xeito paradoxal, as que máis se están a
mollar semellan as administracións locais, como
por exemplo a de Ourense, que son teoricamente as que menos
responsabilidades teñen no problema), pero está claro que seguirá
aí, por desgraza, mentres haxa crise, escalada de paro e, sobre
todo, unha mala xestión das entidades financeiras, económica e
tamén moral. O caso é que nas redes estanse a crear dende hai tempo
múltiples frontes de acción para frear o proceso. O caso de Stop
Desafiuzamentos é paradigmático disto, ao que cómpre engadir unha
iniciativa cuxo desenvolvemento avanzamos hai unhas semanas e que
agora está a piques de coller corpo de xeito definitivo:
Doafund.com. Trátase dun híbrido
entre empresa, ONG anti-crise e comunidade 2.0 que, amais, foi
elixido para participar nunha
lanzadeira europea tecnolóxico-social, UEIA.
Entre outras cousas, permitirá
apadriñar familias en risco de desafiuzamento, facendo fronte común,
ao xeito dunha plataforma de crowdfounding, para axudalas no
seu problema. A iniciativa, posta en marcha por dous novos
empresarios galegos, é “un proxecto social sostíbel para
evitar que a xente sexa expulsada dos seus fogares por mor da crise”,
sinalan. Polo tanto, “xorde como necesidade social fronte ao
modelo tradicional de ONG, asociacións que a día de hoxe
soen ter problemas de financiamento debido á dependencia de
fondos públicos”, engaden.
A web, da que agardamos que nos achegue
en breve unha versión en galego e nas outras linguas cooficiais do
Estado, co fin de subliñar e complementar a súa arela de botar
abaixo barreiras e dar cabida na Rede a tódalas posturas (como se
dun grande fogar seguro se tratase), é como dixemos unha iniciativa
empresarial pero tamén unha fronte de acción social. Segundo
sinalan os seus responsábeis, estamos ante un “proxecto
sostíbel dende o punto de vista económico que acada unha innovación
transformadora de carácter tecnolóxico ao pór en marcha a súa
actividade por medio da web e as redes sociais”.
O servizo Doafund, como dixemos, foi
incluído na ducia de finalistas da primeira aceleradora de
emprendemento social de alicerce TIC de Europa:
UEIA. Este recoñecemento constitúe, en palabras dun dos
impulsores da plataforma, Fernando Sierra García, “un
importante empurrón ao proxecto, e máis tendo en conta que se trata
dun apoio que vén da man da expertos internacionais en emprendemento
e terceiro sector cos que teremos a sorte de contar”.