A veciñanza de Ponteceso pode beneficiarse da formación tecnolóxica da Aula Mentor
mércores, 4 de xaneiro do 2023
Ponteceso
recibiu este mércores 4 de xaneiro a visita da subdelegada do
Goberno na Coruña, María Rivas, quen aproveitou a estadía para
lanzar un convite aos veciños a aproveitar a oportunidade de
mellorar a súa formación tecnolóxica que lles brinda o Goberno e o
Concello co “amplo programa de formación que ofrece a Aula
Mentor”, dixo. Rivas
presentou o programa na Biblioteca Municipal, acompañada polo
alcalde, Lois García. A subdelegada felicitou ao rexedor pola
súa iniciativa, que “permite ao Concello de Ponteceso sumarse a un
programa de formación en liña non regulada para persoas adultas do
Ministerio de Educación”.
María
Rivas lembrou o programa Aula Mentor leva anos funcionando con éxito
en distintos municipios da provincia e expresou a súa confianza 2en
que tamén os veciños e veciñas de Ponteceso sacarán proveito
desta oportunidade”.
Rivas
destacou que, con Aula Mentor, o Ministerio de Educación impulsa a
aprendizaxe aberta, libre, aberta e accesíbel para a poboación ao
longo de toda a vida, en colaboración co Concello. O espazo de
formación, situado na Biblioteca Municipal de Ponteceso, está
destinado a maiores de 18 anos e conta cun catálogo de máis de 170
cursos clasificados por áreas formativas cos que ampliar as
competencias persoais e profesionais.
O
Concello de Ponteceso incorpórase este ano a rede de aulas Mentor,
grazas á sinatura dun convenio de colaboración. Ao sumarse a esta
iniciativa que funciona en toda España, os veciños e veciñas de
Ponteceso poden acceder a formación en liña, tanto desde o seu
domicilio como nos computadores que pon ao seu dispor o Concello na
Biblioteca Municipal. A través da aula pódese obter formación en
áreas como informática e Internet, ofimática, deseño e
autoedición, deseño web, medios audiovisuais, redes e equipamentos
informáticos, instalación e control, programación, educación,
emprendedores, saúde, entre outras.
Os
cursos teñen validez oficial e unha vez superados obtense un
certificado de aproveitamento emitido polo Ministerio de Educación e
Formación Profesional. Segundo explicou Rivas, “a duración dos
cursos depende do tempo que lle dedique cada estudante, xa que se
trata dunha formación a distancia e flexíbel”.